Յաղմուր Աթսըզ
Գրող, լեզվաբան և, ամոթ էլ է ասելը, մեր հայ քաղաքացի Սևան Նշանյանին այդ հայտնի և տարաբախտ Շիրինջե գյուղում գտնվող «ապօրինի» շինարարության պատճառով դատապարտել են 3 տարի 4 ամիս ազատազրկման ու պատժել 160 լիրայի չափով դրամական տուգանքով: Բացի այդ` նրան արգելվել է զբաղվել հասարակական գործունեությամբ, նա նաև զրկվել է ընտրելու և ընտրվելու իրավունքից, ինչպես նաև` բոլոր մյուս քաղաքական իրավունքներից: Էլ ի՞նչ մնաց… Հա’, նրան արգելվել է հիմնել հիմնադրամ, ընկերություն, կոոպերատիվ և այլ նման հիմնարկներ: Նա զրկվել է նաև իր մասնագիտություններից որևէ մեկը կիրառելու իրավունքից: Ըստ իս` տեղին դատավճիռ է, սակայն զգացվում է, որ դատավորը քաշվող ու չափից դուրս զգուշավոր անձնավորություն է, որ գործը շատ չի ծանրացրել: Ըստ էության, քանի որ սկսել էր, պիտի Սևան Նշանյանի աչքերը կուրացնելու, աջ թևն արմուկից կտրելու, նախնիների գերեզմանաքարերը տեղահան անելու, ողջ մնացած ազգականների վզերն էլ կապելով` Յենիքափըի մոտից ծովը նետելու և նրանց գերեզմանների վրայից տրակտորով անցնելու պատիժներ էլ սահմաներ, որ նպատակին հասած լիներ: Նման հրաշալի առիթ են բաց թողել, ափսո~ս:
Ավելին` երեք տարի չորս ամիսն ի՞նչ է որ: Ախր շատ արագ կանցնի: Ես նայեցի Նշանյանի լուսանկարին. համառ մարդու տպավորություն է թողնում: Սա, հաստատ, բանտից դուրս գալուն պես կգնա` Հիլթոն հյուրանոցի հարևանությամբ գտնվող տարածքում մի հետնախորշ կտնկի, դրանից հետո` թե կարող ես` հանիր: Ես միշտ ասել եմ, որ մեր գլխին մշտապես փորձանք է եղել հենց մեր այդ թուլությունը: Եղբա’յրս, թե բռնել ես, գոնե մի 30-35 տարի դատապարտի’ր, որ գործին օգուտ լինի: Լա’վ, ասենք` մտքովդ չի անցել իմ ասած մյուս պատիժները, գոնե այստեղից ծոծրակին նստիր, որ վնասազերծվի: Տեսե’ք, եթե մենք ժամանակին միջոցներ ձեռնարկեինք և այն շրջաններում բնակվող սերբերին ու բուլղարներին բնաջնջեինք, մեր գլխին էդ 93-ի պատերազմի պես դժբախտությունն էլ չէր գա, բայց դե, մորուք չունենք, որ մեր խոսքին ականջ դնեն: Խոսքը քանի բացվել է, ասենք, որ Նշանյանի տների կողքը գտնվող դպրոցի և ոստիկանատան շենքերն էլ են «անօրինական»: Արդյոք հարգելի դատավորը ներս կթողնի՞ ազգային կրթության նախարարին ու ժանդարմերիայի հրամանատարին, ճիշտն ասած` հետաքրքրությունից պայթում եմ:
http://www.stargazete.com/gazete/yazar/yagmur-atsiz/bi-ermeni-var-336567.htm
Leave a Reply