ԽՈԶԱԹ. գավառակ

ԽՈԶԱԹ, Գյուզաթ, Գոզաթ, Խոզադ, Խոզաթ, Ղոզատ, Ղոզատ. գավառակ (կազա) Արևմտյան Հայաստանում` Խարբերդի նահհանգի Դերսիմի գավառում: Կենտրոնն էր Խոզաթ գյուղաքաղաքը: Տարածված էր Դերսիմի գավառի կենտրոնական մասում` Խարբերդից հյուսիս: Լեռնային շրջան է:

20-րդ դ.. սկզբին ուներ 30 բնակավայր, որից 15-ը՝ քրդաբնակ, 15-ը հայ և քուրդ խառը բնակչությամբ: Այստեղ կար 5070 տուն՝ 38284 բնակչով, որից 1966 տուն հայեր՝ 19660 բնակչով, 3104 տուն քրդեր` 18264 բնակչով: Զբաղվում էին երկրագործությամբ, անասնապահությամբ, այգեգործությամբ:

 1890-ական թթ, երբ Դերսիմը նահանգ (վիլայեթ) էր, Խոզաթը նրա գավառներից մեկն էր և իր կազմում ուներ 4 գավառակ (կազա) ու 3 գյուղախումբ (նահիե): 20-րդ դ. սկզբներին Խոզաթը գավառակ էր` Դերսիմի գավառի կազմում: Խոզաթը Չմշկածագի, Մազկերտի և Փերիի գավառակների հետ համապատասխանում էր պատմական Չորրորդ Հայքի Փոքր Ծոփք գավառին: