«Անատոլիայում եթե անգամ ընդամենը մեկ թուրք էլ մնա, այս հայրենիքի սեփականատերը դարձյալ թուրք ազգը կլինի»

Ներկայացնում ենք ոմն թուրք գործչի մղձավանջները, որոնք ծնվել են հայրենիք չունենալու, ավելի ճիշտ՝ ուրիշներից խլած հայրենիքը վաղ թե ուշ տերերին վերադարձնելու անխուսափելիության գիտակցությունից: Ժողովրդական առածն ասում է. «Գող՝ սիրտը դող»:

«Ակունք»

Թուրք օջաքլարը կազմակերպության փոխնախագահ Էֆենդի Բարութչուն ասաց, որ եթե Անատոլիայում անգամ ընդամենը մի թուրք մնա, այս հայրենիքի սեփականատերը դարձյալ թուրքերը կլինեն:

Բարութչուն, ելույթ ունենալով Թուրք օջաքլարը կազմակերպության Բիլեջիքի մասնաճյուղի կողմից կազմակերպված միջոցառման ժամանակ, արձանագրեց, թե իմպերիալիստական ուժերը երբեք չեն կարողացել հանդուրժել թուրքերի գոյությունն այս տարածաշրջանում:

Բարութչուն նշելով, թե իմպերիալիստական ուժերը տարիներ շարունակ պայքար են մղել, որպեսզի թուրքերին մաքրեն Անատոլիայից, և քրիստոնյա տարրերը դարձյալ տիրապետող դառնան այստեղ, քրիստոնյա տարրեր, որոնց համարել են այստեղի հիմնական տերերը, ասաց. «Այս նպատակին հասնելը համարել են կրոնական, բարոյական և, ի վերջո, մարդկային պարտականություն և անհրաժեշտն արել այդ ուղղությամբ: Մի ժամանակ մեր գլխին փորձանք բերեց ԱՍԱԼԼԱ հայկական կազմակերպությունը: 40-ից ավելի մեր դիվանագետները վայրենաբար սպանվեցին Արևմուտքի մայրաքաղաքներում: Այնուհետև այս գործընթացում ներգրավվեց ՊԿԿ-ն»:

Բարութչուն հայնտելով, թե այս տարածաշրջանը նվաճվել է 1071 թ. Ալփարսլանի հրամանատարությամբ, և որ հազար տարի արյուն է հեղվել խաչակրաց արշավանքներում, ասաց. «Անատոլիայում ու Միջին Արևելքում մուսուլմաններին արմատախիլ անել ցանկացող խաչակիրների բանակների բոլոր հարձակումներն անհաջողության են մատնվել` դեմ առնելով Անատոլիայի թուրքի աստվածապաշտ կրծքին: Այսինքն` մեր ազգը սրի իրավունք ունի այս հողերի նկատմամբ: Մենք որևէ մեկին տալու մի խճաքար անգամ չունենք»:

Բարութչուն ասելով, թե «Անատոլիայում եթե անգամ ընդամենը մի թուրք էլ մնա, այս հայրենիքի սեփականատերը դարձյալ թուրքերը կլինեն», հավելեց. «Մեզ համար Դիարբեքիրը նույնքան արժեք ունի, որքան Բիլեջիքը, այսինքն` մենք չենք հրաժարվի նրանից: Մենք Անատոլիայում ապրող մեր բոլոր քուրդ եղբայրներին, իրենց տարբեր զգացող մեր բոլոր քաղաքացիներին կոչ ենք անում միասին շարունակել և պահպանել մեր հազարամյա եղբայրությունը»:

Միջոցառմանը մասնակցել են նաև քաղաքապետ Սելիմ Յաղջըն, նահանգային խորհրդի նախագահ Հասան Հյուսեին Չելիքը, Ազգայնական շարժում կուսակցության նահանգային ղեկավար Մեսութ Թեքինը, Թուրք օջաքլարը կազմակերպության Բիլեջիքի մասնաճյուղի նախագահ Ահմեդ Իշլեքը և այլ հրավիրյալներ:

«Անադոլու» լրատվական գործակալություն

11.03.2011