Սասունցի հայերը դիմում են Մարդու իրավունքների եվրոպական դատարան

Սասունի հայերի սոցիալական փոխօգնության միությունը, որի կենտրոնը գտնվում է Ստամբուլում, պատրաստվում է դիմել Մարդու իրավունքների եվրոպական դատարան, որովհետև միության անդամներին թույլ չեն տվել հիմնադրամ բացել: Նաև Բիթլիսում, Բաթմանում, Վանում, Մուշում և գավառներում բնակվող հայերին ընդգրկող սույն կազմակերպության նախագահ Ազիզ Դաղջըն ասաց. «Մենք ուզում ենք զարգացնել մեր էթնիկական, մշակութային, լեզվական և կրոնական ինքնությունը»:

Բիթլիսից, Բաթմանից, Վանից, Մուշից և Սիիրթից աքսորված կամ դեռ այդ վայրերում ապրող հայերի խնդիրներով զբաղվող Սասուն գավառի և գյուղերի հայերի սոցիալական փոխօգնության, համերաշխության ու մշակույթի կամզակերպությունը, արդեն մի քանի տարի է, ինչ պայքարում է` հիմնադրամ դառնալու համար:

Միության նախագահ Ազիզ Դաղջըի կողմից 6 հիմնադիր անդամների հետ միասին ներկայացված հիմնադրամի գրանցման դիմումը Ստամբուլի 5-րդ քրեական դատարանը «Հայահպատակ փոքրամասնությունները չեն կարող հիմնադրամ ստեղծել` օգտագործելով իրենց համայնքի անվանումը» հիմնավորմամբ մերժել էր` հիմնվելով թուրքական քաղաքացիական օրենսգրքի 101-րդ հոդվածի 4-րդ պարբերության վրա:

Անցյալ տարի վճռաբեկ դատարանից նույնպես ոչ մի արդյունքի չհասած սասունահայերը ներքին իրավական ճանապարհների սպառվելուց հետո պատրաստվում են դիմել Մարդու իրավունքների եվրոպական դատարան:

«Խախտվում է մեր կրոնական ազատությունը»

Կազմակերպության նախագահ Դաղջըն, ուշադրություն հրավիրելով այն հանգամանքի վրա, որ խախտվել է հիմնադրամ հիմնելու, հայերենով կրոնական կրթություն ստանալու և մայրենիով ժողով անելու ազատությունը, նշեց. «Արգելվել է մեր այդ պահանջը: Բացի այդ, արգելքներ են դրվել նաև մեր մտքի, խղճի և կրոնական ազատության վրա: Արհամարհվել է արդար դատվելու մեր իրավունքը: Խտրականություն է կատարվել»:

Դաղջըն հաղորդեց, որ առաջիկա ամիս մեկնելու է Ստրասբուրգ և հանդես գալու դիմումով: Դաղջըն հիշեցնելով, որ հայերենով կրոնական կրթություն ստանալու իրավունքն ամրագրված է Լոզանի պայմանագրում, հայտնեց. «Մենք հավատում ենք, որ մեր արդար դատը շահելու ենք Մարդու իրավունքների եվրոպական դատարանում»:

Իսկ հիմնադրամը հիմնականում նախատեսում է մատուցել հետևյալ ծառայությունները. պսակադրությունները անել տալ քրիստոնյա հոգևորականներին, մկրտել տալ նորածին երեխաներին, հանգուցյալներին թաղել` ըստ կրոնական արարողության և հոգևորականների միջոցով եկեղեցուց հանելով, իրենց կրոնի և սովորույթների համաձայն` գերեզմանոցներ եղած վայրերում ունենալ հոգևորականներ ու քահանաներ, գերեզմաններում աղոթել տալ հանգուցյալների հոգու համար, ինչպես նաև` եկեղեցու և գերեզմանների շուրջը ծածկել պաշտպանիչ պատով:  

Ներկայում Բաթմանին ենթակա Սասունի գավառում դեռևս մեկ հարյուրամյակ առաջ հազարավոր հայեր էին բնակվում: Հայկական տարագրության սկսվելուց անմիջապես առաջ` 1914 թ., Սասուն գավառում էին ապրում 20 հազարից ավել հայեր, այստեղ կային 127 եկեղեցիներ, 6 վանքեր, 15 հոգևոր դպրոց:

Ֆըրաթ լրատվական գործակալություն

http://www.firatnews.com/index.php?rupel=nuce&nuceID=41589