ԿՈՓ

ԿՈՓ, Կոբ, Կողբ. ավան Արևմտյան Հայաստանում, Բիթլիսի նահանգի Մուշ գավառի Բուլանըխ գավառակի կենտրոնը՝ Մուշից մոտ 80 կմ հյուսիս-արևելք՝ Մանազկերտ-Մուշ ճանապարհին՝ Արածանիի վտակ Կորձորի ձախ ափին: Առաջին անգամ հիշատակվում է Վանդիր (Ս.Աղբրիկ) վանքի 995թ. կոնդակում, Կողբ անվանաձևով, որի հետագա աղավաղումից առաջացել է Կոփ անունը:

Առաջին համաշխարհային պատերազմի նախօրերին ունեցել է մոտ 5300 բնակիչ (4500-ը` հայեր): Հայերն զբաղվում էին հողագործությամբ, արհեստներով, անասնապահությամբ: Ունեին եկեղեցի` Ս.Աստվածածին, Ս.Գևորգ, Ս.Թուխմանուկ: Կոփից մոտ 1 կմ հարավ-արևելք գտնվում է Ս.Դանիելի (Կոփա) վանքը:

1915թ. Մեծ եղեռնի ժամանակ Կոփի հայերը մասամբ կոտորվել են, փրկվածներն ապաստանել են Արևելյան Հայաստանում:

Կոփում են ծնվել բանահավաք Բենսեն (Ս.Մովսիսյան), գրողներ Զ.Դարյանը, Ք.Թափալցյանը, Ս.Տարոնցին:

Կոփը վերանվանվել է Բուլանըխ:

Հայկական համառոտ հանրագիտարան, Հատոր 3, Երևան, 1999: