Քաղաքական կուսակցությունները ջերմ են վերաբերվում հայ թեկնածուին

Սահակ Գյուրյան

Մոտ 40 տարի ընդմիջումից հետո ոչ մուսուլման որևէ թեկնածուի` խորհրդարանում պատգամավոր ընտրվելու հավանականությունն սկսել է քննարկվել Թուրքիայի օրակարգում:

Իշխանության և ընդդիմության իրավասու ներկայացուցիչներ, որոնց հետ հանդիպեցինք այս շաբաթ, փոքրամասնություններին հնարավորություն են ընձեռել, որպեսզի վերջիններս առաջադրեն ոչ մահմեդական թեկնածուների, իսկ առաջին կոնկրետ քայլը կատարել է Խաղաղություն և ժողովրդավարություն կուսակցությունը: Կուսակցությանը մոտ գտնվող աղբյուրներից մեզ հասած տեղեկությունների համաձայն` Խաղաղություն և ժողովրդավարություն կուսակցությունը, որը նախատեսում է ընտրություններին մասնակցել անկախ թեկնածուներով, հավանաբար Ստամբուլի 2-րդ շրջանում կաջակցի Հայկո Բաղդատին:

Անցած շաբաթ մի խումբ մտավորականներ, Անկարայում հանդիպելով Խաղաղություն և ժողովրդավարություն կուսակցության համանախագահ Սելահեդդին Դեմիրթաշի հետ, նշեցին, թե անցած ընտրություններին որպես պատգամավորի թեկնածու է առաջադրվել պրոֆեսոր Բասքըն Օրանը, և խնդրեցին, որ Ստամբուլի 2-րդ շրջանում, որտեղ ոչ մուսուլմանները մեծ թիվ են կազմում, աջակցություն ստանա որևէ հայ թեկնածու: Այս առաջարկը սիրով ընդունած Դեմիրթաշը հայ թեկնածուի առաջարկի մասին հաղորդեց Կենտրոնական գործադիր խորհրդին (MYK): Վերջինս էլ սկզբունքային որոշում կայացրեց, ըստ որի` այն շրջաններից, որոնցում մեծ թիվ են կազմում ոչ մուսուլման բնակիչները, կարող են պատգամավորի թեկնածուներ առաջադրել ոչ միայն հայերը, այլև` Թուրքիայում ապրող մյուս էթնիկ խմբերի որոշ առաջադեմ ներկայացուցիչներ: Սակայն շեշտվեց նաև, թե դեռ վաղ է թեկնածուների անունները հայտնելու համար:

Ըստ Ումութ Օրանի` որևէ խոչընդոտ չկա

Ժողովրդահանրապետական կուսակցության գլխավոր նախագահի տեղակալ Ումութ Օրանը մեր այն հարցին, թե ինչպես է իրենց կուսակցությունը վերաբերվում ոչ մուսուլմանների` խորհրդարանում ներկայացվելուն, հետևյալ խոսքերով արտահայտեց այն դասական տեակետը, թե ոչ մահմեդականները ևս, որպես իրավահավասար քաղաքացիներ, կարող են պատգամավոր լինել. «Ոչ մուսուլմանները, ինչպես Թուրքիայի Հանրապետության յուրաքանչյուր քաղաքացի, ունեն հավասար իրավունքներ: Թեկնածու դառնալ ցանկացող ամեն հայ քաղաքացի կարող է դիմելու դեպքում իրականացնել իր ցանկությունը»: Օրանը շեշտելով, թե Ժողովրդահանրապետական կուսակցությունը ջերմ կվերաբերվի ոչ մուսուլման պատգամավորների թեկնածության առաջարկին, ասաց. «Մեր հայ քաղաքացիները պաշտոններ ունեն Ստամբուլի քաղաքական շրջանակներում, քաղաքապետարանի խորհուրդներում, գավառային խորհուրդներում և նահանգային վարչությունում: Ես որևէ խոչընդոտ չեմ տեսնում փոքրամասնությունների կողմից պատգամավորի թեկնածուների առաջադրման առումով: Մեր կուսակցությունը կողմ է ազատություններին ու հավասարությանը, այլ մոտեցում չունենք այս հարցին»:

Ազիզ Բաբուշչուի համաձայն` իրենք քվեներ չեն հաշվում

Արդարություն և զարգացում կուսակցության Ստամբուլի մասնաճյուղի ղեկավար Ազիզ Բաբուշչուն ասելով, թե «Արդարություն և զարգացում կուսակցության դուռը միշտ բաց է քաղաքականությամբ զբաղվել ցանկացող ոչ մուսուլման մեր ընկերների առաջ», իր գոհունակությունը հայտնեց նաև այն բանի կապակցությամբ, որ հունիս ամսին նախատեսվող խորհրդարանային ընտրություններին Արդարություն և զարգացում կուսակցությունն առաջադրելու է մի ոչ մահմեդական թեկնածուի:

Բաբուշչուն շեշտելով, թե քաղաքական կուսակցությունները ոչ մահմեդական թեկնածուի ընտրվելու հարցին պետք է սկզբունքային մոտեցում ցուցաբերեն` «քվեի հաշվարկ» անելու փոխարեն, պատգամավորների թեկնածուների վերաբերյալ մեկնաբանություններ տալիս ընդգծեց նաև հասարակությունների միջև խաղաղությանը նպաստող թեկնածուներին առաջ մղելու անհրաժեշտությունը.

«Անշուշտ, կան զանազան մեկնաբանություններ, սակայն պետք է քայլեր ձեռնարկել` հանուն հասարակական խաղաղության և համերաշխության մշակույթը բոլոր շրջանակներում մնայուն և ազդեցիկ հաղորդակցման միջոց դարձնելու ուղղությամբ: Այս հարցում չպետք է քվեների հաշվարկ անել: Ձայներ շահելուց ավելի առաջնային պլան է մղվում հասարակությունների միջև խաղաղության ապահովումը: Առաջնային նշանակություն չպետք է ունենան այն հարցերը, թե ամեն մի թեկնածու քանի ձայն կարող է բերել կամ որ շրջանակների վրա ազդել»:

Բաբուշչուն մեր այն հարցին, թե այն հանգամանքը, որ իր պահպանողականությամբ հայտնի Արդարություն և զարգացում կուսակցությունը ներկայացնելու է ոչ մուսուլման թեկնածուի, հակազդեցություն չի՞ առաջացնի արդյոք կուսակցության հիմնային շերտերում, տվեց հետևյալ պատասխանը. «Արդարություն և զարգացում կուսակցության հիմքը ընտրություններին ներկայացվող թեկնածուների առումով, թերևս, կանխակալ կարծիքներից ամենաշատ հեռու գտնվող հիմքերից է: Բացի լուսանցքային շատ խմբերից, բացի սադրանքներով լեցուն ժամանակաշրջաններից՝ այս հանրության մեջ բոլոր տարբեր էթնիկ խմբերը պատմության մեջ գրանցել են եղբայրական և խաղաղ գոյակցության օրինակներ: Այս հասարակության ամենահիմնական առանձնահատկությունն այն է, որ նա կարողացել է դարեր շարունակ խաղաղության մեջ պահել և մեր օրեր հասցնել տարբեր քաղաքակրթությունների, հավատքի տարբեր խմբերի: Այդ պատճառով էլ մենք, երբ խոսք է գնում ոչ մահմեդական քաղաքացու առաջադրվելու մասին, որևէ հակազդեցություն չենք սպասում մեր անդամների կողմից»:

«Ակօս» շաբաթաթերթ

Թիվ 777