Պոլսո հայոց աթոռակից պատրարքի ընտրություններում առաջացած ճգնաժամը հաղթահարված է. կընտրվի պատրիարքական փոխանորդ

Անկարան լուծում է գտել Պոլսո հայոց աթոռակից պատրիարքի ընտրություններում առաջացած ճգնաժամը հաղթահարելու համար:

Թուրքական Hurriyet օրաթերթի փոխանցմամբ` Ստամբուլի նահանգապետարանի միջնորդությամբ Թուրքիայի ներքին գործերի նախարարությանը ամիսներ առաջ ներկայացվել էին Պոլսո հայոց պատրիարքարանի «աթոռակից պատրիարք» և «պատրիարք» ընտրելու թույլտվություն ստանալու մասին դիմումներ: Դրանք ուսումնասիրելուց հետո թուրքական կառավարությունը երեկ պատրաիրքարան է ուղարկել հարցի առնչությամբ իր որոշումը, որում նշվում է. «Ճիշտ չէ ընտրել աթոռակից պատրիարք կամ պատրիարք՝ գործող պատրարքի կենդանության օրոք կամ առանց նրա ինքնակամ հրաժարականի: Ավելի հարմար կլինի պատրիարքի կամ աթոռակից պատրիարքի փոխարեն ընտրել պատրիարքական փոխանորդ»:

Հիշեցնենք, որ ընթացիկ տարվա հունվարին Պոլսո հայոց պատրիարքարանի աթոռակից պատրարքի ընտրությունների հարցում առաջացել էին որոշ խնդիրներ՝ աթոռակից պատրիարք ընտրելու նպատակով ձևավորված Նախաձեռնող խորհրդի ինքնագլուխ քայլերի պատճառով:

Խնդիրը հետևյալն էր. Պատրիարքարանի հոգևոր խորհուրդը դիմել էր Ստամբուլի նահանգապետարան` «աթոռակից պատրիարք» ընտրելու թույլտվություն ստանալու համար, իսկ որոշ ժամանակ անց Նախաձեռնող խորհուդն էր դիմել թուրքական իշխանություններին, սակայն ոչ թե «աթոռակից պատրիարք», այլ «պատրիարք» ընտրելու թույլտվության համար: Սա լուրջ քննարկման առարկա էր դարձել Պոլսո հայոց համայնքում, քանի որ Նախաձեռնող խորհուրդն օժտված չէ նման լիազորություններով: Բացի այդ՝ համայնքը կարող էր նոր պատրիարք ընտրել նախկին պատրիարքի մահվան կամ հրաժարականի դեպքում: Իսկ ինչպես հայտնի է, Պոլսո հայոց պատրիարքարանի աթոռակից պատրիարքի ընտրություն որոշվել էր անցկացնել պատրիարք Մեսրոպ արքեպիսկոպոս Մութաֆյանի առողջական վատ վիճակի պատճառով:

Պոլսո հայոց պատրիարքարանի աթոռակից պատրիարքի ընտրություններին առաջադրվել են երեք թեկնածուներ` Պոլսո հայոց պատրիարքի տեղապահ, արքեպիսկոպոս Արամ Աթեշյանը, Հայաստանի Գուգարաց թեմի առաջնորդ Սեպուհ եպիսկոպոս Չուլջյանն ու Գերմանիայի հայերի հոգևոր առաջնորդ Գարեգին եպիսկոպոս Բեկչյանը:

Tert.am, 30.06.10