Սկսվել է համեղ ուտեստների և քաղաքակրթությունների մայրաքաղաք Հաթայի օրեր միջոցառումը: Արաբ, թուրք ու հայ ազգերով բնակեցված քաղաքակրթության այս քաղաքը, որի պատմությունը հասնում է մինչև Քրիստոսից առաջ ընկած դարերը, իր բոլոր կողմերով Անկարա տեղափոխվեց: Միջոցառման ծրագրի շրջանակներում, որը տևելու է մինչև չորեքշաբթի օրը` հունիսի 30-ը, ջանասիրաբար ներկայացվելու են Հաթայի բոլոր մշակութային առանձնահատկությունները` գավառներից մինչև գյուղեր: Հաթայցիների կազմակերպած առաջին տոնավաճառը մեծ հետաքրքրություն արթնացրեց Անկարայի բնակիչների, ինչպես նաև` իրենց` հաթայցիների մեջ:
Տոնավաճառի բացման ժամանակ բոլոր տաղավարներում շրջած և իր համերկրացիների հետ գրկախառնված Թուրքիայի Արդարադատության նախարար Սադուլլահ Էրգինին մենակ չթողեցին Արդյունաբերության նախարար Նիհաթ Էրգյունը և պատգամավորներ: Արդարադատության նախարար Էրգյունը ելույթներից հետո Հաթայի նահանգապետ Ջելալեթթին Լեքեսիզի, գավառապետերի և քաղաքապետերի հետ միասին պատգամավորներին ու նախարարներին տեղեկություններ տվեց Հաթայի մասին:
Հաթայի օրեր միջոցառման մասնակիցները հնարավորություն ունեցան մոտիկից տեսնել դափնու օճառը, Սամանդաղի նարինջը, Քըրըքհանի սեխը, մետաքսագործությունը, քարագործությունը, Թուրքիայի միակ հայկական գյուղ Վաքըֆլըն, Հաթայի առաջին բնակավայր Շենքյոյ քաղաքի ձիթապտուղը, քյունեֆե և բըջը-բըջը քաղցրավենիքները, ինչպես նաև` հաթայցիների հյուրընկալությունը:
Թուրքիայի առաջին հայկական գյուղը` Վաքըֆլըն
Թուրքիայում գտնվող միակ հայկական գյուղ Վաքըֆլըն, որն ունի մոտ 600 տարվա պատմություն, տոնավաճառում հանդես է գալիս իր համեստ տաղավարով: Գյուղապետ Պերճ Քարթունը հայտնեց, որ 35 տուն և 130 բնակիչ ունեցող այս գյուղի ժողովուրդը կենսական միջոցներ է ապահովում ցիտրուսային մրգերի և կողմնակի ապրանքների վաճառքի միջոցով: Իրենց տաղավարներում հատկապես օրգանական գյուղատնտեսության միջոցով ձեռք բերված արտադրանքների մասին տեղեկություններով հանդես եկած Քարթունն ասաց, որ մի ժամանակ իրենք ապրանք են վաճառել Գերմանիային, Ֆրանսիային, Հոլանդիային և Անգլիային, սակայն վերջին երկու տարում այլևս չեն արտահանում: Գյուղապետ Քարթունը նշելով, թե իրենց գյուղի բնակիչների միջին տարիքը 60-ն է, հայտնեց նաև, որ ինքը տեղ է գտել 12 գյուղապետերի հիմնած ֆոլկլորային խմբում: Քարթունն ասաց, թե իրենց գյուղում երիտասարդ բնակիչներ չեն մնացել, և հավելեց. «Մեր գյուղում պանսիոն ենք հիմնել: Հաթայ այցելող զբոսաշրջիկների 70 տոկոսը մեր գյուղ էլ է գալիս: Ունենք մի եկեղեցի, որը ներկայում գործում է: Մեր բոլոր գյուղերի և մարդկանց հետ համատեղ ապրելով` գեղեցիկ օրինակ ենք ծառայում մյուսների համար»:
Վաքըֆլը գյուղի բնակիչները սպասում են անկարացիներին` իրենց տաղավարներում ներկայացված նռան թթվով, ձիթապտղի ու դափնու յուղերով, օճառի տեսականիով, ընկույզով, թուրինջով, մոշի մուրաբաներով, մանդարինի հյութով, մեղրով և ուրցով:
www.beyazgazete.com
27.06.2010
Leave a Reply