Վանում իրականացվող «Վանի ջրային մարզաձևերի փառատոնի» շրջանակներում կազմակերպվեց «Հանուն Թամարի սիրո» լողի մրցույթը, որին մասնակցեցին 30 լողորդներ: 4800 մետրանոց տարածությունը հաղթահարելով՝ լողորդները նավամատույցից հասան Աղթամար կղզի:
Վանի Գևաշ գավառում գտնվող Աղթամար կղզում Վանի ջրային մարզաձևերի փառատոնի շրջանակներում անցկացված «Հանուն Թամարի սիրո» լողի մրցույթը մեծ ոգևորություն առաջացրեց: Աղթամար կղզու լեգենդը պահպանելու և ներկայացնելու նպատակով իրականացված սույն մրցույթին մասնակցեցին 30 լողորդներ: Դժվարին մրցույթի ժամանակ Աղթամար կղզում լողորդներին դիմավորեց հայ աղջիկ Թամարին ներկայացնող դերասանուհին` ձեռքին ջահ:
Այս դժվարին մրցույթում 4800 մետր տարածությունն առաջինը հաղթահարեց Բերք Օզգյուրը:
Մրցույթի մասնակիցները հայտնեցին, որ շատ հաճելի էր Վանա լճում լողալը:
Մրցույթի ավարտից հետո ելույթ ունեցած Վանի փոխնահանգապետ Հալիլ Բերքը նշեց, որ վանեցիները պետք է ավելի շատ կարևորեն ջրային մարզաձևերը: Փոխնահանգապետ Բերքն ասաց նաև հետևյալը. «Այս մրցույթի կազմակերպման նպատակն էր երկար տարիներ հետո վերականգնել Թամարի այն գեղեցիկ սերը, քանզի գոյություն ունի այս կղզու հետ կապված մի պատմական լեգենդ: Մենք էլ այս լեգենդը վերակենդանացնելու համար այս տարի առաջին անգամ կազմակերպեցինք այս մրցույթը: Մրցույթն անցավ բավականին հաճելի և խանդավառ մթնոլորտում: Ես շատ գոհ մնացի, հուսով եմ, որ մեր հյուրերը նույնպես հավանեցին»:
Մուրադ Չաղլարը հաղորդում է Վանից,
«Դողան» լրատվական գործակալություն, 22.06.10
Leave a Reply