ԱՄՆ-ի Պետքարտուղարությունը հաղորդեց, որ Համաշխարհային հուշարձանների հիմնադրամին կցուցաբերվի 625 հազար դոլարի չափով օգնություն` Կարսի սահմանին գտնվող Անիի ավերակներից Սուրբ Փրկիչ եկեղեցու վերականգնման նախագծի համար:
Հրապարակվեցին Ամերիկայի կոնգրեսի կողմից 2000 թ. հիմնադրված և Պետքարտուղարությանը կից գործող «Ամերիկայի արտակարգ և լիազոր դեսպանների հիմնադրամը` հանուն մշակույթի պահպանման» կազմակերպության այն նախագծերը, որոնք ֆինանսական աջակցություն կստանան 2010 թ.: ԱՄՆ-ի նյութական աջակցությամբ կվերականգնվի նաև Թուրքիայում ամենահին հայկական կառույցներն ունեցող Կարսի նահանգում գտնվող Անիի ավերակներից մնացած 11-րդ դարի մի եկեղեցի:
Պետքարտուղարությունը հայտնեց, որ Անիի փլատակներում գտնվող Սուրբ Փրկիչ եկեղեցու պահպանումն ու վերականգնումը նախատեսող նախագծի համար Համաշխարհային հուշարձանների հիմնադրամին է հատկացվել 625 հազար դոլարի չափով գումար: Համաշխարհային հուշարձանների հիմնադրամն աշխարհի տարբեր երկրների պատմական ու մշակութային հուշարձանները պահպանելու նպատակով հիմնված մի կազմակերպություն է, որի կենտրոնը գտնվում է Նյու Յորքում…
Ըստ Համաշխարհային հուշարձանների հիմնադրամի` այս նախագծին վերաբերող տեղեկությունների` վերոհիշյալ եկեղեցին 1001 թ. կառուցել է տվել Կատրամիդեն թագուհին: Ճարտարապետական տեսանկյունից գոթական ոճ ունեցող սույն եկեղեցին 1996 թ. ի վեր ընդգրկվել է Համաշխարհային հուշարձանների հիմնդրամի պահպանման ցանկում: Վերոնշյալ հիմնադրամը նպատակ ունի, եկեղեցին վերականգնելով, Անիի ավերակներն ավելի գրավիչ դարձնել զբոսաշրջիկների համար:
ԱՄՆ-ի Պետքարտուղարությունը հայտնեց նաև, որ 2010 թ. «Ամերիկյան արտակարգ և լիազոր դեսպանների հիմնադրամը` հանուն մշակույթի պահպանման» կազմակերպության շրջանակներում ֆինանսական աջակցություն կցուցաբերվի նաև Մոնղոլիայում, Պակիստանում և Աֆղանստանում նախատեսվող երեք տարբեր նախագծերի:
«Ամերիկայի ձայն» ռադիոկայան, 22.06.2010, Վաշինգտոն
Leave a Reply