Ըստ «Թայմս» օրաթերթի` քրիստոնյաները վախենում են Էրգենեքոնից

«Թայմս» օրաթերթը Մեծ կղզում գտնվող հունական որբանոցը հետ վերադարձնելու մասին Եվրոպայի մարդու իրավունքների դատարանի կայացրած որոշմանն անդրադառնալիս նշել է նաև, որ Թուրքիայի քրիստոնյա համայնքը վախենում է խորքային պետության կազմակերպություններից:

Եվրոպայի մարդու իրավունքների դատարանի վերոհիշյալ որոշման մասին հիշեցնող անգլիական «Թայմս» օրաթերթը պաշտպանել է այն գաղափարը, թե 40 տարի շարունակ անտեր մնացած որբանոցի շենքը 3 ամսվա ընթացքում հունական պատրիարքարանին վերադարձնելու որոշումը մեծ հաղթանակ է պատրիարքարանի համար: «Թայմսը», ուշադրություն հրավիրելով այն բանի վրա, թե Մարդու իրավունքների դատարանի ընդունած վերոհիշյալ որոշումը կարող է նախադեպ հանդիսանալ Թուրքիայում տասնյակ տարիներ առաջ բռնագրավված բազմաթիվ անշարժ գույքերի` քրիստոնյա համայնքին վերադարձնելու առումով, գրել է նաև, որ մոտավորապես հազար մասնավոր գույքեր են գտնվում Վաքըֆների գլխավոր տնօրինության ձեռքին: Թերթը մեջբերել է նաև մի թուրք փաստաբանի այն խոսքերը, թե Եվրոպայի մարդու իրավունքների դատարանի կայացրած վերոհիշյալ որոշմամբ կարող է նախադեպ ստեղծվել Թուրքիայի կառավարության ձեռքում գտնվող բազմաթիվ մասնավոր գույքերի վերադարձի համար:

«Արդարություն և զարգացում կուսակցությունը կարևոր առաջընթացներ է գրանցել, բայց քրիստոնյա համայնքը վախենում է խորքային պետությունից

«Թայմսը» գրելով, որ իշխող «Արդարություն և զարգացում» կուսակցությունը Թուրքիայում ապրող քրիստոնյա համայնքի համար նշանակալի փոփոխություններ է կատարել օրենքներում, ուշադրություն է հրավիրել նաև հետևյալի վրա. «Բայց և այնպես, քրիստոնյա համայնքը դեռ զգում է ճնշման վախը: Քրիստոնյաները հատկապես վախենում են խորքային պետության կազմակերպությունների ծայրահեղ ազգայնական ներկայացուցիչներից, որոնք պաշտոններ ունեն թուրքական բանակում և բյուրոկրատական ապարատում»:

«Թայմս»-ում տպագրված հոդվածում առաջ է քաշվել նաև այն տեսակետը, ըստ որի` Թուրքիայի հունական համայնքը տարիներ առաջվա համեմատ շատ է նվազել, նաև նշվել է, որ թեև 1700 տարի շարունակ Ստամբուլում գտնվող Ուղղափառ պատրիարքարանը ներկայացնում է աշխարհի 300 միլիոն քրիստոնյա համայնքներ, սակայն թուրք կառավարությունը չի ընդունում պատրիարքարանի էկումենիկ դերը:

«Ջիհան» գործակալություն, 22.06.2010