Ըստ գնդապետ Գյուլմենի` «Վանդակ» գործողությունների պլանը նախապատրաստել են փայլուն ապագա ունեցող սպաների բարձրացումը կանխելու նպատակով

Ստամբուլի 12-րդ ծանր հանցագործությունների քրեական դատարանում ընթացող նիստին մեղադրյալներից գնդապետ Լևենթ Գյուլմենն ավարտեց իր պաշտպանական ճառը: Գյուլմենը հայտնեց, որ թե’ ծանուցող նամակներում և թե’ «Վանդակ» գործողությունների պլանին վերաբերող փաստաթղթերում տեղ են գտել բազմաթիվ զինվորների անուններ և նրանց մասին տեղեկություններ:

Գյուլմենը փոքրամասնություններին պատկանող դպրոցներին ուղարկված սպառնալիքների պարունակող նամակների առնչությամբ ասաց հետևյալը. «Մի’ մոռացեք, որ այս երկրում (Թուրքիայում) բնակվող մեր բազմաթիվ հայ քաղաքացիների կողքին գտնվում են նաև փախստական հայեր, ովքեր, Հայաստանի քաղաքացիներ լինելով, տնտեսական դժվարությունների  մեջ են ապրում և իրենց գոյությունը պահպանում են Թուրքիայում ու Ստամբուլում: Նրանց թիվը հասնում է 100 հազարի: Հայտնի են նաև վերջիններիս աշխատավայրերը և բնակության տեղերը:   Այս արտահայտությունները ձեզ ինչ-որ տեղից ծանոթ չե՞ն թվում: Մի՞թե լրիվ պատահականութուն է, որ սրանից մի քանի ամիս առաջ մեր հարգելի վարչապետը Անգլիա կատարած այցի ժամանակ BBC ռադիոկայանին տված իր հարցազրույցներից մեկում հենց նույն արտահայտություններ է արել: Եթե 3 տարվա վաղեմություն ունեցող այս տեքստի հեղինակը որակվում է որպես փոքրամասնություններին ուղղված սպառնալիքների հեղինակ, մի՞թե նույն բանն արած չի լինում հարգելի վարչապետն ինքը, որը դիմում էր միլիոնավոր մարդկանց, և որի խոսքերը բազմիցս կրկնեցին մեր երկրի զանգվածային լրատվամիջոցները: Այդ դեպքում վարչապետը «Վանդակ» օպերացիայի կիրառո՞ղն է, թե՞ խոսնակը»:

15.06.2010, www.beyazgazete.com