Թուրքիայի Ազգային կրթության նախարար Նիմեթ Չուբուքչուն մասնակցել է հայկական դպրոցների միջոցառմանը

Թուրքիայի Ազգային կրթության նախարար Նիմեթ Չուբուքչուն մասնակցել է հայկական դպրոցների տարեվերջյան միջոցառմանը: Չուբուքչուն հետևյալ ավետիսը հաղորդեց. «Ձեր համայնքի դպրոցներում մայրենի լեզվով դասավանդվող դասերին վերաբերող գրքերի նախապատրաստական աշխատանքները հասել են վերջնակետի: Երբ այդ աշխատանքներն ավարտվեն, մեր նախարարությունը ձեր մայրենի լեզվով դասագրքերը անվճար կտպագրի և կբաժանի»:

Չուբուքչուն, մասնակցելով Գում Գափու թաղամասի Քազազ Ամիրա սրահում մի մանկապարտեզի, 14 տարրական դպրոցի և 5 վարժարանի կողմից համատեղ կազմակերպված «Մասնավոր հայկական փոքրամասնական դպրոցների տարեվերջյան» միջոցառմանը, իր բացման խոսքում նշեց, թե այսօրվա դրությամբ գոյություն ունեցող 22 հայկական դպրոցներում (այդ թվում` մի մանկապարտեզ, 16 տարրական դպրոց, 5 միջնակարգ հաստատություն) կրթություն է ստանում 2633 աշակերտ և արձանագրեց. «Լոզանի պայմանագրի դրույթների շրջանակներում երաշխավորված փոքրամասնական դպրոցներն անթերի կատարում են կրթելուն ու դաստիարակելուն ուղղված իրենց պարտավորությունները և այդպիսով շատ կարևոր ներդրում են ունենում Թուրքիայի կյանքում: Տեղյակ ենք, որ մեր այդ դպրոցներում կան որոշ խնդիրներ: Մեր նախարարությունը, ձեր համայնքին պատկանող դպրոցներում կրթության մակարդակը բարձրացնելու նպատակով համագործակցելով դպրոցների տնօրենների հետ, կարևոր բարելավումներ է արել: Նախարարությունը փոքրամասնություններին պատկանող դպրոցներում սովորող բոլոր աշակերտներին անվճար ապահովել է թուրքերենին ու թուրքական մշակույթին վերաբերող դասագրքեր: Բացի այդ` ձեր համայնքի դպրոցներում մայրենի լեզվով դասավանդվող դասերին վերաբերող գրքերի նախապատրաստական աշխատանքները վերջնակետին են հասել: Երբ այդ աշխատանքներն ավարտվեն, մեր նախարարությունն անվճար կտպագրի և կբաժանի ձեր մայրենի լեզվով դասագրքերը»:

Չուբուքչուն հայտնելով, որ դպրոցներում խնդիր է եղել հայերեն լեզվի, ինչպես նաև` կրոնական մշակույթի ու բարոյագիտության ուսուցիչներ գտնելու առումով, հավելեց. «Այդ խնդիրը լուծելու համար հնարավորություն տրվեց, որպեսզի հայկական ծագում ունեցող և համապատասխան ֆակուլտետների շրջանավարտ Թուրքիայի քաղաքացիները կարողանան դառնալ հայոց լեզվի և կրոնական մշակույթի ու բարոյագիտության ուսուցիչներ»:

Չուբուքչուն ելույթ ունենալուց հետո դիտեց ներկայացումները և ավարտական վկայականներ հանձնեց դպրոցի լավագույն սաներին: Չուբուքչուին էլ բոլոր դպրոցների անունից նվիրեցին Ստամբուլի պատկերը, որում տեղ էր գտել նաև 22 հայկական դպրոցների տարբերանշանը:

Ռադիկալ օրաթերթ, Ստամբուլ, 10.06.2010