Իսքենդերունում եպիսկոպոս է սպանվել

 Անատոլիայի կաթոլիկ եկեղեցու եպիսկոպոս Լուիջի Փադովեսեն դանակահարվել ու սպանվել է Հաթայի Իսքենդերուն գավառում գտնվող տան պարտեզում:

Դեպքը պատահել է ժամը 14:25-ին վերոհիշյալ գավառին ենթակա ծովափնյա Քարաղաչ քաղաքի Սուլթանքյոյ գյուղաքաղաքում:

Չորսհարկանի շենքի առջևի պարտեզում դաշունահարված Փադովեսեն, որը Անատոլիայի ու Սիրիայի կաթոլիկ եկեղեցիների սպասավորն էր, վախճանվել է հիվանդանոց տարվելիս:

Նշվում է, որ սպանությունն իրականացվել է վարորդի կողմից:

Լուր ստանալուն պես դեպքի վայր ժամանած ոստիկանությունը հետաքննություն է սկսել` շրջակայքը վերահսկողության տակ վերցնելով: Իսկ սպանության մեջ կասկածվող վարորդը հետապնդվում է:

Նախատել էր Իսրայելին

Փադովեսեն նախորդ օրը մասնակցել էր Հաթայի Իսքենդերուն գավառում երկար տարիներ որպես կինոթատրոն օգտագործված և Վաքըֆների գլխավոր վարչության կողմից վերականգնվելուց հետո եկեղեցու վերածված ասորական կաթոլիկ եկեղեցու առաջին պատարագին, որի ընթացքում դատապարտել էր Իսրայելի հարձակումը:

Ըստ ստացված տեղեկության` Փադովեսեի սպանությունից հետո դեպքի վայր է գնացել Իզմիրում Իտալիայի հյուպատոս Սիմոն Կարտան:

Անկարայում Իտալիայի դեսպանատան աշխատակիցները նշելով, թե դեպքը դեռ նոր է կատարվել, և որ իրենք մոտիկից հետևում են զարգացումներին, հայտնեցին նաև, որ հյուպատոս Կարտան մեկնել է Իսքենդերուն:

Եպիսկոպոսարանը` Անատոլիայում

Անատոլիայի Առաքելական փոխանորդությունը հիմնվել է 10 տարի առաջ: Այն ներառում է Թուրքիայի կեսից ավելին` Միջերկրական ծովից մինչև Սև ծով, Անկարայից մինչև իրաքյան սահմանն ընկած հատվածը:

Հիշեցնենք, որ Սանտա Մարիա կաթոլիկ եկեղեցու իտալացի վանական Անդրեա Սանտորոն էլ սպանվել էր 2006 թ. փետրվարի 5-ին Տրապիզոնում:

http://www.ntvmsnbc.com/id/25102637/

03.06.10