Թուրք պատվիրակը արևմտահայերենը չի ներառել վտանգված լեզուների մասին զեկույցում

Թուրքիայի հրավերով մայիսի 10–11–ը Ստամբուլում անցկացվել է ԵԽԽՎ Մշակույթի, գիտության և կրթության հանձնաժողովի նիստը, որին Հայաստանից մասնակցել է հիշյալ հանձնաժողովի մշտական անդամ, ՀՀ ԱԺ «Ժառանգություն» խմբակցության պատգամավոր Զարուհի Փոստանջանը։

Այսօր լրագրողների հետ կայացած հանդիպմանը Զարուհի Փոստանջյանը տեղեկացրեց, որ նիստի ընթացքում, ի թիվս մի շարք զեկույցների, քննարկվել են առավել վտանգված լեզուների վերաբերյալ զեկույցի, բանաձևի և հանձնարարականի նախագծերը, որոնց հեղինակը, Փոստանջյանի խոսքով, ԵԽԽՎ թուրք պատվիրակ Երտողուլ Կումսումօղլին է։

«Ժառանգության» պատգամավորը նշեց, որ թուրք պատվիրակն արևմտահայերենը հմտորեն հանել է իր զեկույցից և չի ընդգրկել վտանգված լեզուների շարքում։ Մինչդեռ, ըստ Փոստանջյանի, ՅՈՒՆԵՍԿՕ-ի կողմից հաստատված վտանգված լեզուների ցանկում կա արևմտահայերենը։

Զարուհի Փոստանջյանի խոսքով, թուրք պատվիրակի զեկույցին զեկույցով պատասխանել է ինքը, մասնավորապես ընդգծելով, որ արևմտահայերենը հայտնվել է վտանգված լեզուների ցանկում Հայոց ցեղասպանության պատճառով։ Թուրք պատվիրակն էլ Զարուհի Փոստանջյանին պատասխանել է, որ «Ցեղասպանության մասին խոսելիս` վիրավորվում են իր զգացմունքները և թուրք ինքնությունը»։

«Թուրք ցանկացած պաշտոնյա այդպես է արձագանքում, երբ խոսվում է Հայոց ցեղասպանության մասին»,– ասաց Զարուհի Փոստանջյանը։

Նա նաև տեղեկացրեց, որ վտանգված լեզուների փաստաթղթի քննարկումը հետաձգվել է, քանի որ թեման համարվել է բավական ընդգրկուն։ Առաջիկա ամիսներին փաստթղթի շուրջ առաջարկություններ կանեն ԵԽԽՎ հիշյալ հանձնաժողովի անդամները։

Tert.am, 14.05.10