Ստամբուլի Բիլգի համալսարանում քննարկվում է «հայկական տաբուն»

Ստամբուլ – Արիան Բոնզոնի պատրաստած «Երկխոսություններ հայկական տաբուի մասին» վերնագրով գրքի հրատարակումից հետո, որը կազմվել է Ստամբուլի Գալաթասարայ համալսարանի դասախոս, դոկտոր, պրոֆեսոր Ահմեդ Ինսելի և ֆրանսահայ Միշել Մարիանի երկխոսությունների հիման վրա (վերջինիս պապն ականատես է եղել 1915 թ. դեպքերին), կազմակերպվում է նաև մամլո ասուլիս: Հրանտ Դինքի անվան միջազգային հիմնադրամի և «Իլեթիշիմ» հրատարակչության կողմից կազմակերպվող մամլո ասուլիսն սկսվելու է վաղը` ժամը 18:30-ին, Ստամբուլի Բիլգի համալսարանի Դոլափդերե համալսարանական ավանի BS2 սրահում:

Ահմեդ Ինսելի և Միշել Մարիանի ասուլիսի մասին մամլո հաղորդագրության մեջ նշվում է հետևյալը. «Մի՞թե արդեն հնարավոր է, որ հայերն ու թուրքերը դեմ առ դեմ քննարկեն անցյալում կատարված դեպքերը: Ահմեդ Ինսելն ու Միշել Մարիանը խոսում են միմյանց հետ` առանց արհեստական համաձայնության գալու և առանց աչքաթող անելու իրար նման գնահատականների հետ մեկտեղ նաև միմյանցից տարբերվող տեսակետները: «Միություն և առաջադիմություն» կուսակցության կառավարության արածը ցեղասպանություն համարող Միշել Մարիանի և դա մարդկության դեմ կատարված հանցագործություն որակող Ահմեդ Ինսելի այս երկխոսության մեջ ամեն մեկը կարող է գտնել իրեն հոգեհարազատ մի հատիկ»:

Ռադիկալ, 12.05.2010