Պատմությունը ոչնչացվում է

Եկեղեցու տեղում աղբակույտ է ու աթարի դեզ

Թուրքիայի Վան նահանգի Գյուրփընար գավառի Մեժինգեր գյուղում գտնվող և գանձագողերի կողմից լրիվ ավերված 2 հայկական եկեղեցիներից մեկն օգտագործվում է որպես աղբանոց, որտեղ կան նաև աթարի հետքեր, իսկ մյուսի տեղում մզկիթ է կառուցվել: Ոչ միայն այս գյուղից, որտեղ խորը փոսեր են փորվել, այլև հայկական գերեզմանոցից ևս հետք անգամ չի մնացել` մի քանի կտոր քարից բացի, որոնց վրա կան հին գրություններ:

Այս շրջանում հայերին պատկանող բազմաթիվ եկեղեցիների և գերեզմանոցների նման, որոնք պահպանման տակ չեն վերցվել, Մեժինգեր գյուղի 2 հայկական եկեղեցիներն ու գերեզմանոցը նույնպես գանձագողերի անգթության պատճառով  ամբողջությամբ ավերվել են: Գերեզմանոցում, որտեղ մարդկային ոսկորները լիովին ոչնչացվել են, ուշադրություն են գրավում ցաքուցրիվ եղած մի քանի քարեր, որոնց վրա կան հին գրություններ:

AKnews-ին հարցազրույց տված գյուղի բնակիչներից Իսա Վարլըն հայտնեց, որ մի քանի տարի առաջ իրենց գյուղ եկած և որպես լրագրող ներկայացած երեք հոգի պեղումներ են արել եկեղեցում և գերեզմանոցում, վերջիններիս քանդված քարերն էլ հետագայում գործածվել են գյուղացիների կողմից` այգիների պարիսպների և այլ շինությունների համար: Վարլըն նշելով, թե գերեզմանոցը նույնպես հետագայում լիովին ոչնչացվել է գանձագողերի կողմից, նաև ասաց. «Մենք ավելի ուշ տեղեկացանք, որ մեր գյուղ ժամանած լրագրողներն իրականում գանձագողեր են: Քանի դեռ շրջապատում լուրեր էին պտտվում, թե այստեղ «ոսկի է գտնվել», ամեն եկող սկսեց պեղել եկեղեցիներն ու գերեզմանատունը: Ի վերջո եկեղեցիներն ու գերեզմանոցը լրիվ անհետացան: Ինչպես տեսնում եք, այս գերեզմանոցում ընդամենը մի քանի քար է մնացել, առանց այդ էլ այն այլևս ոչնչով գերեզմանոց չի հիշեցնում: Վերևում էլ կա մի եկեղեցի, որը շրջապատված է պարիսպներով: Այն դարձել է աղբի և թրիքի տեղ»:

Մեկ ուրիշ գյուղացի, որը չցանկացավ ներկայանալ, հայտնեց, որ երկրորդ եկեղեցու տեղում ներկայում մի մզկիթ է կառուցվում, որի շինարարությունը շարունակվում է:

Վահդեդդին Վարլը անվամբ մեկ այլ գյուղացի, AKnews-ի թղթակցի հարցին ի պատասխան, ասաց, թե ոչ մի իրավասու չի ժամանել իրենց գյուղ, որպեսզի տեղում տեսնի ավերված եկեղեցու և գերեզմանատան վիճակը:

Վանի Հավաքական կյանք կազմակերպության (KOLYAD) նախագահ Հյուսնյու Ուրգյունը նշեց, որ Մեժինգեր գյուղում կատարվածն ուղղակի ամոթ է, որն ուղղված է պատմության դեմ: Ուրգյունը հայտնելով, որ իրենք, որպես կազմակերպություն, հետաքրքրվում են նաև բնական և պատմական վայրերով, հավելեց. «Այս գյուղում կատարվածը վատ օրինակ է ծառայում մեր ողջ նահանգին: Անախորժ դրություն է թե’ հավատքի և թե’ պատմության հանդեպ հարգանքի տեսանկյունից: Եթե իրավասուները ժամանակին միջոցներ ձեռնարկեին, նման բաներ տեղի չէին ունենա: Եթե մեր նահանգը ավերելու փոխարեն պահպանենք նաև զբոսաշրջության համար և կարևորենք այն ներկայացնելը, շատ ավելի լավ կլինի, և նման բաներ այլևս չեն կրկնվի»:

aknews.com/tr 10.05.2010