Սեռական սկանդալի պատճառով Թուրքիայի գլխավոր ընդդիմադիրը հրաժարական տվեց

Այսօր հրաժարական է տվել Թուրքիայի ամենախոշոր ընդդիմադիր Ժողովրդա-հանրապետական կուսակցության նախագահ Դենիզ Բայքալը:

Թուրքական լրատվամիջոցների փոխանցմամբ` Բայքալն իր հրաժարականի մասին հայտարարել է կուսակցության նիստի ժամանակ:

Նշենք, որ օրեր առաջ թուրքական Vakit թերթի համացանցային տարբերակում հեռարձակվել էր Դենիզ Բայքալի և նույն կուսակցության անդամ, կին պատգամավոր Նեսրին Բայթոքի միջև սեռական հարաբերությունների տեսագրությունը, որ նկարահանվել էր թաքնված տեսախցիկով:

Դենիզ Բայքալն իր հրաժարականի առնչությամբ հայտարարել է, որ դրա պատճառը իր դեմ կազմակերպված դավադրությունն է:

«Այդ դավադրությունը կազմակերպվել է վերջին երկու շաբաթվա ընթացքում և դրվել շրջանառության մեջ: Ես անձնատուր չեմ լինի այդ կեղտոտ արշավին և անբարոյական դավադրությանը: Եթե դրա գինը Ժողովրդահանրապետական կուսակցության ղեկավարի պաշտոնից իմ հրաժարականն է, ապա ես պատրաստ եմ վճարել դա»,- հայտարարել է Բայքալը:

Tert.am