«Թուրքը մնում է թուրք». սահմանամերձ Մարգարայի բնակիչները դեմ են սահմանի բացմանը

Հայ-թուրքական սահմանին գտնվող Մարգարայի բնակիչները դեմ են սահմանի բացմանը, ասում են՝ վտանգավոր է:

Հիշեցնենք, որ դիվանագիտական աղբյուրը NEWS.am-ին հայտնել էր, որ հնարավոր է մարտի սկզբին հայ-թուրքական սահմանը բացվի:

«52 տարի ապրում եմ էս գյուղում, էս տանը, մեր տան դուռը գիշեր, ցերեկ բաց է, բայց սահմանը բացվելու դեպքում չեմ կարա էս ձեւի վստահ լինեմ, էդ ժամանակ արդեն փակվելու են դռները, ի՞նչ իմանամ, ով է գալիս, ովքեր են, ինչեր են»,- NEWS.am-ի հետ զրույցում ասում է մարգարայի բնակիչ Հայկարամ Աբրահամյանը:

Բնակիչներից Ենոք Խաչատրյանն էլ հարց է տալիս, թե ինչ իմաստ ունի սահմանը բացելը. «Ադրբեջանը էն յանից է ճնշում, սա էլ էս կողմից կնճնշի, դրա իմաստը որն է, ասենք բացեցին, ավելի վնաս, քան թե օգուտ: Եթե ռուսը դուրս եկավ սահմանից, մեր վիճակը կվատանա»:

Մարգարայի բնակչուհի Ազատուհի Ավետիսյանն էլ ասում է, որ չի ցանկանում սահմանը բացվի. «Թուրքը մնում է թուրք, իմ կիսուր-կեսրարը մազապուրծ փախել, եկել են, մեզ պատմել են, որ թուրքի հետ ընկերանալ պետք չի: Հիմա լավ, վատ ռուսը մեզ պահում է, ախային ենք: Մեզ վնասից բացի ոչ մի օգուտ չկա»:

Մանրամասները՝ տեսանյութում․

https://news.am/arm/news/867613.html