Թուրքիայի կողմից ահաբեկչական ճանաչված «Քուրդիստանի բանվորական կուսակցության» (ՔԲԿ-PKK) հիմնադիրներից և Թուրքիայի կողմից PKK-ի հետ նույնացվող «Քուրդիստանի համայնքների միության» (KCK) կառավարման խորհրդի անդամ Մուստաֆա Քարասուն անդրադարձել է թուրքական պետության ներսում տեղի ունեցող ներքաղաքական իրադարձություններին:
Նա Թուրքիայում տեղի ունեցողը որակել է որպես ներքաղաքական պատերազմ:
Մուստաֆան, անդրադառնալով իշխող Արդարություն և զարգացում կուսակցության (ԱԶԿ-AKP) ներքաղաքական կոշտ հռետորաբանության փափկացմանը և գլխավոր ընդդիմադիր ուժը համարվող Ժողովրդահանրապետական կուսակցության (ԺՀԿ-CHP) միջև նշմարվող բարիդրացիական հարաբերությունների հիմնմանը և կամ դրանց կարգավորմանը, ընդգծել է.
«Եթե կարիք կա կարգավորման, դա ԱԶԿ-ԱՇԿ իշխանությունն է: Դրա համար էլ անհրաժեշտ է, որ նրանք հրաժարվեն նախկինում իրենց հնչեցրած օտարացնող, բևեռացնղ, մեղադրական, թշնամացնող և նման շատ այլ խոսույթներից և գործելաոճից»:
Նա հավելել է, որ ԱՇԿ-ի հետ հարաբերությունների մասով անհանգստացած է նաև Թուրքիայի նախագահ Ռեջեփ Թայիփ Էրդողանը, ում կարծիքով, այդ կուսակցության ընկալումները վնասում են իրեն:
«Թե՛ ներսում, թե՛ դրսում ԱԶԿ-ի իշխանության նկատմամբ անվստահություն է ձևավորվում, այդ իսկ պատճառով էլ որոշ հարցերում ցանկանում է ցույց տալ, որ ԱՇԿ-ից տարբերվող դիրքորոշում ունի: Հենց այս պատճառով էլ առանց ընդհատելու ԱՇԿ-ի հետ միասին վարած 9 տարվա քաղաքականությունը, ցանկանում է ստեղծել պատկերի փոփոխություն:
Այդ պատճառով ցատկել է Օզգյուր Օզելի (ԺՀԿ առաջնորդ) կարգավորման խոսույթի հետևից: Իր մտածածը պատկերի փոփոխության համար որպես արդարացնող մի ծածկոց է ծառայում: Առանց փոփոխություն մտցնելու հիմնական քաղաքականության մեջ և փափուկ լեզվով խոսելով՝ ցանկանում է ժամանակ շահել»,-ասել է PKK-ի համահիմնադիրը:
Ապա նաև հավելել, որ ԱԶԿ-ի և ԱՇԿ-ի միջև տարբեր են տեսակետները նաև քրդերի վերաբերյալ: ԱՇԿ-ն «քրդերի ցեղասպանության» հարցը կողպված է համարում, այդ իսկ պատճառով էլ նման քաղաքակնության մեջ չի ցանկանում տեսնել որևիցե փոփոխություն ու արտահայտել է այդ մասով իր ունեցած մտահոգությունները:
«Իրականում Թայիփ Էրդողանը փնտրում է այնպիսի նոր դաշինքներ, որոնց պարագայում ԱՇԿ-ն կաջակցի դրսից (չի լինի դաշինքում, սակայն կաջակցի-խմբ.): Եթե դա հաջողի նա կնախընտրի կառավարումը շարունակել նրո դաշինքներով՝ այլ կերպ ստանալով ԱՇԿ-ի աջակցությունը: Սակայն ոչ ոք թո՛ղ չմտածի, որ Թայիփ Էրդողանի ԱԶԿ-ն հրաժարվելու է քրդերի և ժողովրդավարության դեմ թշնամական քաղաքականությունից»,-եզրափակել է Քարասուն:
Leave a Reply