Վեներա Մակարյանն իր նոր աշխատության մեջ վեր է հանել հայերի կարգավիճակի առանձնահատկությունները օսմանյան շրջանում

Մատենադարանի հրատարակչությունը լույս է ընծայել Մատենադարանի գիտաշխատող Վեներա Մակարյանի «Պատմական Սիրիայի հայերը օսմանյան շրջանում (16-18-րդ դարեր)» աշխատությունը:
Գիրքը նվիրված է Պատմական Սիրիայի հայերի օսմանյան շրջանի, մասնավորապես՝ 16-18-րդ դարերի պատմության, սոցիալ-տնտեսական կարգավիճակի և հոգևոր-մշակութային կյանքի ուսումնասիրությանը։

Մատենադարանից հայտնում են, որ փորձ է արվել երևան հանել և ընդգծել տեղի հայերի կարգավիճակի առանձնահատկությունները Օսմանյան կայսրության՝ այլադավանների նկատմամբ վարած քաղաքականության համատեքստում։ Նյութը շարադրված է հայերեն և այլալեզու սկզբնաղբյուրների, վավերագրերի և գրականության հիման վրա։

Գիրքը նախատեսված է հայ գաղթօջախների, Պատմական Սիրիայի մաս կազմող ներկայիս պետությունների և Օսմանյան կայսրության պատմության ուսումնասիրողների համար։
Խմբագիրներ՝ պ. գ. դ. Արշակ Փոլադյան և Միհրան Մինասեան։

https://www.panorama.am/am/news/2023/12/23/%D5%8E%D5%A5%D5%B6%D5%A5%D6%80%D5%A1-%D5%84%D5%A1%D5%AF%D5%A1%D6%80%D5%B5%D5%A1%D5%B6/2943808