Գերմանական թերթը Թուրքիայի հարավային շրջանները ներառել է «Քուրդիստանի» մեջ

Գերմանական «Tagesschau» թերթն անդրադարձել է Սիրիայի ու Իրաքի հյուսիսում Թուրքիայի օդուժի սկսած հրթիռակոծություններին, որոնք թիրախավորել են քուրդ զինյալների հենակետերի ու էներգետիկ ենթակառուցվածքները։

Այս համատեքստում  գերմանական պարբերականը  հրապարակել է քարտեզ, որտեղ ցուցադրվել են այն բնակավայրերը, որոնք թիրախավորվել են թուրքական օդուժի կողմից։  Թուրքական լրատվամիջոցների  զայրույթն է առաջացրել այն փաստը, որը վերանոշյալ քարտեզում ներկայիս Թուրքիայի հարավային ու   հարավարևելյան շրջաններ ներառվել են «Քուրդիստանի» մեջ։

Թուրքիայի օդային ուժերը  2 օր է, ինչ  ինտենսիվ հրթիռակոծությունների տակ են պահում  պաշտոնական Անկարայի կողմից ահաբեկչական ճանաչված Քուրդիստանի բանվորական կուսակցության‎ (ՔԲԿ-PKK) ու Սիրիայի քրդական ուժերի հենակետերը։ Թուրքիայի պաշտպանության նախարարության վերջին տվյալներով՝ հրթիռակոծման հետևանքով սպանվել է 29 քուրդ զինյալ։

Թուրքական լրատվական կայքերում տեսանյութեր են հրապարակվել, որտեղ երևում է, թե ինչպես են Թուրքիայի հարվածային ԱԹՍ-ները ոչնչացնում քրդական թիրախները։ Որոշ ռուսական թելեգրամյան ալիքներ էլ տեսանյութեր են հրապարակել, որտեղ թուրքական ուժերը ոչնչացրել էին Սիրիայի հյուսիսում գտնվող ֆրանսիական ցեմենտի գործարան։

Հիշեցնենք, որ Թուրքիայի պաշտպանության նախարարությունը հունվարի 12-ին էր սոցիալական ցանցում կատարած գրառմամբ տեղեկացրել, որ Իրաքի հյուսիսում իրականացվող «Մագիլ-Կողպեք» ռազմագործողության ընթացքում սպանվել է 9 թուրք զինվորական։  Թուրքիայի զինված ուժերի գործողությունները սկսվել են հենց այդ դեպքից հետո։

https://www.ermenihaber.am/am/news/2024/01/15/%D4%B9%D5%B8%D6%82%D6%80%D6%84%D5%AB%D5%A1/265589