Թուրքիայում երկրաշարժի հետևանքով ավերված քաղաքներից մեկն ամբողջությամբ կքանդվի

Թուրքիայի Գազիանթեպ (Այնթափ-Ակունքի խմբ․) նահանգի Նուրդաղի քաղաք, որն օրեր առաջ տեղի ունեցած ավերիչ երկրաշարժի հետևանքով լուրջ վնասներ է կրել, ամբողջությամբ կքանդվի։ Այս մասին, ինչպես փոխանցում է ՌԻԱ Նովոստին, երկուշաբթի՝ փետրվարի 13-ին, հայտարարել է նահանգապետի պաշտոնակատար Օսման Բիլգինը։

Նրա խոսքով՝ որոնողափրկարարական աշխատանքներ են տարվում վերջին ութ տներում, որտեղ փլատակների տակ դեռ կարող են մարդիկ լինել։

«Մենք շատ մեծ աղետ վերապրեցինք։ Քաղաքաշինության նախարար Քուրումի հետ որոշում կայացրինք, որ մաքրելու ենք բոլոր փլատակները․ քաղաքն ամբողջությամբ՝ 100 տոկոսով ավերված է։ Միայն մեկ շենքի փլատակների տակ 150 զոհ ենք գտել։ Քաղաքը կվերակառուցվի»,- ասել է նահանգապետի պաշտոնակատարը։

Թուրքական լրատվամիջոցների հաղորդմամբ՝ քաղաքի բնակչությունը կազմում էր առնվազն 40 հազար մարդ։

https://www.tert.am/am/news/2023/02/13/turkey/3896282