Երկրաշարժի հասցրած վնասների մասին տեղեկություններ Անթաքիայից և Վաքըֆլըից

Լորա Բայթար Չափար

Մեր ընկերուհի Լորա Բայթար Չափարը և նրա ամուսին Ջեմ Չափարը ապրում են Հաթայի Վաքըֆլը գյուղում։ Թեև երկրաշարժից գյուղը մեծ վնասներ չի կրել, սակայն շենքերում ճաքեր են ի հայտ եկել։ Սակայն Սամանդաղում եւ Անթաքիայում վնասը մեծ է։ Լորա Բայթար Չափարը տեղեկություններ է տվել Վաքըֆլըում և Անթաքիայում տեղի ունեցածի վերաբերյալ։

Կիրակի՝ փետրվարի 6-ին, ժամը 04:17-ին Քահրամանմարաշի (Մարաշ-Ակունքի խմբ․) Փազարջըք շրջանում տեղի ունեցած 7,7 մագնիտուդով երկրաշարժը և դրանից հետո երկրորդ՝ 7,6 մագնիտուդով երկրաշարժը քարտեզից ջնջել են Անթաքիա և Սամանդաղ քաղաքների կենտրոնները։ Երկրաշարժը ցնցել է Անթաքիայում բնակվող հայ համայնքի ներկայացուցիչներին։ Երկրաշարժից հետո քաղաքում գրեթե անձեռնմխելի տներ չեն մնացել․ տների մեծ մասը չափից դուրս վնասված է։ Քանի որ քիչ վնասված տներն էլ վերանորոգման կարիք ունեն, ժողովուրդը չի կարողանում տուն մտնել։ Վաքըֆլըն այս երկրաշարժի անվտանգ շրջաններից մեկն էր։ Գրեթե բոլոր տներին վնաս հասցրած երկրաշարժից հետո ժողովուրդը հավաքվել է գյուղի սրճարանի վրանային հատվածում։ Գյուղում ավերված տներ կամ զոհված գյուղացիներ չկան։ Փրկարար կազմակերպությունները, ինչպիսիք են ԱԻՆ-ը կամ Կարմիր մահիկը, երկրաշարժից հետո չկարողացան գալ Հաթայ։ Քաղաքում մարդիկ, ովքեր կարող էին օգնել, երկար ժամանակ չէին կարողանում շփվել միմյանց հետ, կամ մնացել էին սողանքների տակ։ Այս իրավիճակը փլատակների տակ գտնվողներին ցուցաբերվելիք միջամտությունը ևս ուշացրեց։

Անտուան Հորոզը և նրա դուստրերը՝ Ռենիտա և Պոլյաննա Հորոզները, որոնք ապրում էին Անթաքիայի կենտրոնում, այն անթաքիացիների թվում էին, որոնց տունը փլուզվել է երկրաշարժից։ Մինչդեռ Ռենիտա և Պոլյաննա Հորոզները 40 ժամ անց դուրս էին բերվել փլատակների տակից, հայտնաբերվեց հայր Անտուան ​​Հորոզի անկենդան մարմինը: Անտուան ​​Հորոզին հողին հանձնեցին Վաքըֆլըի եկեղեցում տեղի ունեցած արարողությունից հետո։

Իսկենդերունում կան նաև փլատակների տակ մնացածներ՝ Բալըքչը ընտանիքից։

Հայտնի է նաև, որ Պայծառ Սիլահլըի տունն էլ է փլուզվել, սակայն փրկարարները նրան դեռ չեն գտել։

Իրավիճակը Վաքըֆլըում

Փետրվարի 6-ին տեղի ունեցած երկու երկրաշարժից հետո Վաքըֆլըի եկեղեցու արտաքին տեսքը վնասվել է։ Ձեղնահարկը գտնվում է վատ վիճակում, կան վնասներ։ Եկեղեցու այգուն կից զուգարանի պատի քարե երեսպատում թափվել է։ Տներում էլ վնասներ են գրանցվել։ Սպասվում է, որ փորձագետները գալու են վնասի չափի կամ ​​բնակեցվելու պիտանի լինելու վերաբերյալ որոշման համար։ Զեյթունիեում ավերված տներ կան։ Մարդիկ ողջ են։

Գյուղի նորակառույց շենքը չի վնասվել։ Ավերվել են Իսկենդերունի եկեղեցու 2 խորանները։ Շենքում փլուզում կա։ Տանիքի խնդիր կա։ Բնակարանային վնասը մեծ է։

Իսկենդերունի լատինական կաթոլիկ եկեղեցին քանդվել է։ Մեծ վնաս է հասել ուղղափառ եկեղեցուն և Արսուզի կաթոլիկ եկեղեցուն… Վնասվել է նաև ասորական ուղղափառ եկեղեցին։

Շրջանից 18 հոգի Ստամբուլ է գնացել Թուրքիայի Հայոց պատրիարքարանի կողմից ուղարկված ավտոբուսով։ Պատրիարքարանի օգնությունը ևս հասել է շրջան։

https://www.agos.com.tr/tr/yazi/28151/antakya-ve-vakiflikoy-den-notlar

Թարգմանեց Տիգրան Չանդոյանը

Akunq.net