Հրանտ Դինքի սպանության նպատակով դավադրության մեջ կասկածվողն արտահանձնվել է Ղրղզստանից

Թուրքահայ լրագրող Հրանտ Դինքի սպանության նպատակով դավադրության ն մեջ կասկածվողը ձերբակալվել եւ արտահանձնվել է Ղրղզստանից, հայտնում է կառավարամետ Daily Sabah-ը։

Կասկածյալի անունը նշված է միայն որպես Ա.Ի., սակայն նա արդեն ազատազրկման է դատապարտվել 12 տարի վեց ամիս ժամկետով: Ըստ Daily Sabah-ի՝ թուրքական հետախուզական ծառայություններին հայտնի է դարձել, որ Ա.Ի.-ն թաքնվում էր Ղրղզստանի մայրաքաղաք Բիշքեկում, ինչն էլ ստիպել էր նրանց օգնության համար դիմել տեղական իշխանություններին։

Թուրքիայի իշխանությունները ձերբակալման եւ արտահանձնման մասին հայտարարել էին կիրակի օրը, սակայն «Ազատ Եվրոպա/Ազատություն ռադիոկայան»-ը հայտնում է, որ Ղրղզստանի իշխանությունները կասկածյալին ձերբակալել են մարտի 4-ին։ Նա բերման էր ենթարկվել փետրվարի 26-ին կեղծ անձնագրով եւ վարորդական իրավունքի վկայականով:

Դինքը Ստամբուլում լույս տեսնող հայալեզու «Ակոս» թերթի գլխավոր խմբագիրն էր, երբ 2007 թ․ հունվարի 19-ին նրա վրա կրակել էին իր գրասենյակի մոտ: Օգյուն Սամասթը մոտ տարածությունից երեք անգամ կրակել էր Դինքի գլխին։ Թուրք ծայրահեղ ազգայնական Սամասթը մեղավոր է ճանաչվել 2011 թ․ Դինքի սպանության համար եւ դատապարտվել 22 տարվա ազատազրկման, սակայն դեռ հարցեր են մնում պետական ​​անվտանգության ուժերի ենթադրյալ ներգրավվածության վերաբերյալ:

Չնայած Դինքի գործով ձերբակալություններին եւ դատավճիռներին՝ նրա ընտանիքը համոզված է, որ լրագրողի սպանության մասին շատ ավելին պետք է իմանալ: Դինքի սպանության գործով ձերբակալվածներից ոմանք թուրքական անվտանգության ծառայությունների անդամներ էին, սակայն թուրք դատախազները պնդում են, որ նրա սպանությունը կապված է իսլամական քարոզիչ Ֆեթուլլահ Գյուլենի կողմնակիցների հետ։

Գյուլենը մեղադրվում է նախագահ Ռեջեփ Թայիփ Էրդողանի դեմ 2016 թ․ հուլիսին անհաջող հեղաշրջման փորձի կազմակերպման մեջ, սակայն նա իր առնչությունն այդ գործողության հետ:

https://news.am/arm/news/693679.html