Թուրքիայի նախագահ Ռեջեփ Թայիփ Էրդողանը 2019 թ. տեղի ունենալիք նախագահական ընտրություններին կարող է չհաղթահարել պահանջվող 51 տոկոս ձայնի շեմը, այս մասին հայտնել է թուրքական SONAR հետազոտական կենտրոնի տնօրեն Հաքան Բայրաքչըն, գրում է «Սյոզջու» պարբերականը:
Ըստ Բայրաքչըի՝ Էրդողանի համար առաջիկա ընտրությունները շատ ծանր են լինելու, և դրա պատճառը ոչ միայն երկրում առկա տնտեսական խնդիրներն են, այլև վերջին շրջանում Էրդողանի ճնշման տակ հարկադրված հրաժարական տված մեծ քաղաքների քաղաքապետերի գործառույթը:
«Այդ մարդկանց 15 տարի հանել եք ընտրողի առաջ ու նրանց միջոցով ձայն խնդրել, իսկ հիմա ազատում եք պաշտոնից՝ չբացատրելով բուն պատճառը: Ժողովուրդը չի՞ հետաքրքրվի՝ իսկ ինչո՞ւ այդպես եղավ: Սա շատ մեծ սխալ էր և իր հետևանքները կունենա ընտրություններում», – ասել է հետազոտական կենտրոնի տնօրենը:
Հիշեցնենք, որ ամիսներ առաջ Էրդողանի պահանջով իրենց պաշտոնը լքել են մի շարք քաղաքապետեր՝ այդ թվում Անկարայի քաղաքապետ Մելիհ Գյոքչեքը: Ազատված բոլոր քաղաքապետերն Էրդողանի կուսակիցներն էին:
Կադրային զտումներն սկսվեցին սահմանադրական փոփոխությունների հանրաքվեից հետո խորացած քաղաքական ներքին ճգնաժամի ֆոնին, երբ էրդողանամետները սպասվածից քիչ ձայներ հավաքեցին, թեև հաղթեցին ընտրություններում: Շատերը խոստովանեցին, որ իշխանությունների համար դա լուրջ ահազանգ էր, և դրան կհետևի իշխող կուսակցության ներսում կադրային լուրջ փոփոխությունների ծրագիրը:
Էրդողանը սահմանադրական փոփոխությունների վերաբերյալ հանրաքվեում 51 տոկոս ձայնի աջակցությամբ հաստատելով կառավարման նախագահական համակարգ՝ երկրի բոլոր խոշոր քաղաքներում կորցրած ձայները վերականգնելու համար լուրջ կադրային զտումների է դիմում, իսկ վերջերս էլ դժգոհել է, որ կուսակցության նիստերին գործիչներն իր ուզածի պես ակտիվ չեն:
http://www.tert.am/am/news/2017/12/28/erdogan/2577191
Leave a Reply