«Ես այդպիսի բան ոչ կարդացել եմ, ոչ էլ լսել եմ». Աթեշյանը՝ Իշխանաց կղզիների բնակչության թիվը մեծացնելու մասին

Արամ արքեպիսկոպոս Աթեշյանը գերազանցապես հայկական, հրեական եւ հունական համայնքներով բնակեցված Իշխանաց կղզիների բնակչությունը 14 հազարից 76 հազարի հասցնելու Էրդողանի նոր ծրագրի մասին չի լսել: NEWS.am–ի հետ զրույցում նա նշեց, որ հայաբնակ Քնալը կղզին գերբնակեցված է, եւ իր համար անհասկանալի է՝ ինչ ճանապարհով է հնարավոր ավելացնել կղզու բնակչության թիվը:

«Քնալըի բնակչության թիվը շատացնել հնարավոր չէ: Տարածքը պետք է ընդարձակ լինի, բայց այդպես չէ: Ես այդպիսի բան ոչ կարդացել եմ, ոչ էլ լսել եմ, նախատեսվող շինարարության մասին էլ լսած չկամ»,-ասաց նա:

Նշենք, որ Էրդողանի նոր ծրագրի համաձայն՝ գերազանցապես հայկական, հրեական եւ հունական համայնքներով բնակեցված Իշխանաց կղզիներում շուտով կարող է լայնածավալ շինարարություն սկսվել, ինչի արդյունքում Թուրքիայի իշխանությունները հույս ունեն կղզիների բնակչությունը 14 հազարից հասցնել 76 հազարի, բնականաբար, թուրք բնակչության ավելացման հաշվին։ Վերլուծաբանների կարծիքով՝ կղզիների ուրբանիզացման այս ծրագրի իրական նպատակն այն է, որ քրիստոնյա եւ հրեա բնակչությունն այլեւս մեծամասնություն չլինի։ Կղզիների բնակիչները դժգոհ են՝ այս նախագիծը պլանավորելիս՝ իրենց կարծիքը ոչ ոք հաշվի չի առել։ Եթե այս ծրագիրն իրականություն դառնա, Քնալըն այլեւս դժվար կլինի անվանել հայերի կղզի:

https://news.am/arm/news/429036.html