Եթե նա այդքան մեծ գործեր է արել, ինչո՞ւ ստամբուլահայերը նրան տեր չկանգնեցին. պատրիարքարանը պատասխանել է Աթեշյանի հայաստանյան հայտարարություններին

Պոլսո Հայոց պատրիարքությունը պատասխան է հղել Արամ արքեպիսկոպոս Աթեշյանի՝ հայաստանյան այցի ժամանակ լրագրողների հետ կայացած հանդիպմանը հնչեցրած մի շարք աղմկահարույց հայտարարությունների առնչությամբ:

Պատիարքարանի պաշտոնական կայքում հրապարակված հայտարարությամբ կառույցը հերքել է Աթեշյանի մի շարք հայտարարություններ ու կոչ արել վերջինիս բռնել համայնքի ներսում բարձրաստիճան հոգևորականին վայել համբավ ձեռք բերելու ուղին:

Պատրիարքարանի տարածած հայտարարության մեջ, մասնավորապես, անդրադարձ է կատարվում Արամ Աթեշյանի կողմից հայաստանյան ասուլիսի ժամանակ անցած 9 տարիների ընթացքում ստամբուլահայ համայնքին մատուցած ծառայությունների ու գրանցած լուրջ հաջողությունների մասին հայտարարություններին: Պատրիարքարանի հղած պատասխանում նշվում է, որ Ստամբուլի հայ համայնքն այս հարցի շուրջ բոլորովին այլ կարծիք ունի:

«Եթե նա իսկապես այդքան կարևոր ու օգտակար գործեր է արել, ինչո՞ւ ժողովուրդը նրան տեր չկանգնեց: Ինչո՞ւ ժողովուրդը նրա այդ ծառայությունների մասին չի խոսում: Եվ ինչո՞ւ նրա հոգևոր եղբայրները պատրիարքի տեղապահի դռնփակ ընտրության ժամանակ խնայեցին նրան տրվելիք ձայներն ու նախընտրեցին ձայն տալ մի հոգևորականի, որին ավելի քիչ էին ճանաչում», – ասվում է պատրիարքարանի հայտարարության մեջ:

Հայտարարության հեղինակներն ուշադրություն են հրավիրել այն փաստի վրա, որ Արամ Աթեշյանն անձամբ է ղեկավարել պատրիարք Մեսրոպ Մութաֆյանին հիվանդության պատճառով անգործունյա ճանաչելու որոշում կայացրած ժողովը, թեև այժմ հրաժարվում է ընդունել գործընթացի օրինականությունը՝ պնդելով, թե չմահացած պատրիարքին պաշտոնանկ անելը դեմ է 1863 թ. պոլսահայ համայնքի կողմից ընդունված ու պետության կողմից հաստատված Ազգային սահմանադրությանը:

«Արամ արքեպիսկոպոս Աթեշյանը, հղում անելով Ազգային սահմանադրությանը, նշում է, որ ընտրված պատրիարքը պետք է այդ պաշտոնում մնա մինչև մահ: Սակայն Արամ Սրբազանը, չգիտես ինչու, անտեսում է նույն փաստաթղթի երկրորդ մասը, որը հստակ նշում է, որ տարբեր պատճառներից ելնելով՝ պատրիարքի անգործունյա ճանաչվելու դեպքում հնարավոր է նոր պատրիարքի ընտրություն կազմակերպել»,- գրված է հաղորդագրության մեջ:

Ինչ վերաբերվում է ընտրված պատրիարքի տեղապահ Գարեգին արքեպիսկոպոս Բեկչյանի՝ պետության կողմից չընդունվելու մասին Աթեշյանի պնդումներին՝ պատրիարքարանի մամուլի ծառայությունը նշել է. «Արամ Աթեշյանը պնդում է, որ եթե պատրիարքի ընտրությունների անցկացման վերաբերյալ պատրիարքարանի դիմումին Ստամբուլի նահանգապետարանն այդպես էլ պատասխան չի տվել, նշանակում է` չեն ընդունում տեղապահ Բեկչյանին: Որպես մեր եկեղեցու անդամ հոգևորական, որն իր իսկ պնդմամբ աջակցում է պետության այդ դիրքորոշմանն ու իր գոհունակությունն է հայտնում այդ առիթով, առավել ճիշտ չէ՞ր վարվի, եթե, ելնելով իր 9-ամյա փորձից, քննադատեր պետության նման վարվելաձևն ու շեշտեր դրա փոփոխման անհրաժեշտության մասին: Ինքն անձամբ բազմիցս պետությունից մի գրվածքի համար ամիսներ շարունակ պատասխան չի՞ սպասել»:

Եվ վերջում, Գարեգին Բեկչյանի՝ տեղապահի պաշտոնից հրաժարական տալու դեպքում պատրիարքական ընտրությունների միանգամից իրականացվելու մասին Աթեշյանի տարածած հայտարարություններին ի պատասխան պատրիարքարանը նշել է, որ նման տեղեկությունների աղբյուրն իրենց համար շարունակում է անհայտ մնալ:

«Եթե նա այս ամենն ասում է իր և թուրքական պետության մտերմիկ հարաբերությունների ու համագործակցության մասին շեշտելու նպատակով, ապա հարկ ենք համարում հարցնել. ինչո՞ւ պատրիարքի փոխանորդ եղած ամբողջ ժամանակահատվածում պատրիարքական ընտրության իրականացման ու գործընթացն ավարտին հասցնելու համար որևէ ջանք չի թափել»,- ասված է հաղորդագրությունում:

Նշենք, որ Պոլսո պատրիարք Մեսրոպ Մութաֆյանը կոմայի մեջ է գտնվում 2008թ-ից և փաստացի չի կարող կատարել պատրիարքի իր լիազորությունները։ Նրա փոխարեն այդ լիազորությունները կատարում էր Արամ արքեպիսկոպոս Աթեշյանը, որն ընտրված էր ոչ թե համայնքի, այլ պետության կողմից:

2016թ. հոկտեմբերի 26-ին Պոլսո Հայոց պատրիարքարանը հայտարարել է պատրիարք Մեսրոպ Մութաֆյանին անգործունյա ճանաչելու որոշման մասին, ինչը ենթադրում է նոր պատրիարքի ընտրության մեկնարկ, որի համար անհրաժեշտ էր նախ ընտրել Պոլսո Հայոց պատրիարքի նոր տեղապահ, որը կղեկավարեր ընտրական գործընթացը:

2017թ. փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի ունեցավ Պոլսո Հայոց պատրիարքի նոր տեղապահի ընտրություն: Ընտրություններում Արամ արքեպիսկոպոս Աթեշյանին հաղթած Գարեգին արքեպիսկոպոս Բեկչյանը, չնայած Աթեշյանի ու պետության կողմից միջամտություններին, ստանձնեց Պոլսո Հայոց պատրիարքի տեղապահի պաշտոնը և արդեն ձեռնամուխ է եղել պատրիարքի ընտրությունների կազմակերպմանը։

Դեռևս օգոստոսին նախաձեռնող խումբը, Պոլսո Հայոց պատրիարքի տեղապահ Գարեգին Բեկչյանի գլխավորությամբ, Ստամբուլի նահանգապետարանին է հանձնել պատրիարքի ընտրությունների անցկացման մասին դիմումը՝ առաջարկելով դրանք անցկացնել դեկտեմբերի 13-ին: Նահանգապետարանը պետք է պատասխան հղեր համայնքին մինչև հոկտեմբերի 9-ը, սակայն սպասված պատասխանը մինչ օրս չկա:

http://www.tert.am/am/news/2017/12/28/ateshyan/2576693