Հեքիաթ է, Թուրքիայի պետության հետաքրքրության առարկան Աթեշյանը չէ. Գարեգին արք. Բեկչյանի հարցազրույցը՝ NEWS.am-ին

Հեղինակ՝ Աիդա Հովհաննիսյան

Պոլսո հայոց պատրիարքական տեղապահ Գարեգին արքեպիսկոպոս Բեկչյանը NEWS.am-ին տված հարցազրույցում անդրադարձել է Երեւանում կայացած Արամ արքեպիսկոպոս Աթեշյանի մամուլի ասուլիսին, հնչեցրած մեղադրանքներին եւ մյուս հայտարարություններին:

-Սրբազան, Արամ արքեպիսկոպոս Աթեշյանը Երեւանում հայտարարել է, որ Պոլսո Հայոց պատրիարքի ընտրություններ դեռ տեղի չեն ունենա: Արդյոք դա այդպե՞ս է, Թուրքիայի իշխանություններն իսկապես թույլ չեն տալի՞ս ընտրություններ անցկացնել:

-Արամ Սրբազանի հարցազրույցը լսել եմ, բավական բան կա խոսելու: Պետությունը թույլ տալու-չտալու հարց չունի, պետության կողմից նման տեղեկատվություն մեզ ոչ ոք չի տվել, մենք դիմումներ ենք ուղարկել տեղապահի ընտրություններից հետո եւ պատասխաններին ենք սպասում: Մինչեւ փետրվար մենք ժամանակ ունենք, այնպես որ պետության կողմից ժխտական կեցվածք կամ հայտարարություն մեզ չեն հայտնել:

Արամ Սրբազանն ասում է՝ տեղապահին չի ընդունում պետությունը, բայց տեղապահը պետությանը որեւէ կերպ դիմում չի ներկայացրել ընդունվել-չընդունվելու վերաբերյալ, այդ ինչպե՞ս է նման բան հայտարարում Սրբազանը Երեւանում` չեմ հասկանում… Բացի դրանից, Արամ Սրբազանը հայտարարել է, որ տեղապահի ընտրության ժամանակ պետությունը նամակ է գրել, այո, նամակ գրվել է, բայց ի՞նչ նպատակով. նախորդ պատրիարքը մեկ տարի առաջ թոշակի էր անցել եկեղեցական համագումարի կողմից, բայց այդ տեղեկությունը պետությանը գրավոր ձեւով չէր ներկայացվել: Պետությունից մենք նամակ էինք ստացել այդ մասին: Չեմ հասկանում՝ ինչու է շփոթություն ստեղծում, պետք չէ, որ այս կերպ արտահայտվեն, ճշմարտությունը պետք է ասվի:

-Արամ Սրբազանը նշում է, որ կուսակալն իրեն ասել է, թե ինքը պետք է մնա, իսկ Դուք հեռանաք: Այդպե՞ս է:

-Նման բան չի եղել, կուսակալի հետ հանդիպմանը ներկա է եղել երկու աշխարհական, Սահակ Սրբազանը, այդպիսի բան չի ասել: Այդ բաները որտեղի՞ց է ասում` չեմ հասկանում:

-Այսինքն սխալ տեղեկություն է հայտնե՞լ:

-Լրիվ սխալ տեղեկություններ է տվել, նա ճշմարտությունը չի պատկերացնում: Ճիշտ չէ, որ այդպիսի բան է ասում, ինչո՞ւ է Երեւանում նման հարցազրույց տվել: Ինքը հիմա պաշտոն չունի, այլեւս փոխանորդ չէ: Որ ասում է՝ փոխանորդ եմ մնում` զարմանում եմ… երկու տեսակի կամք պետք է հաշվի առնել՝ ազգային, եկեղեցական եւ պետության: Պետությունը կարող է այլ կերպ մտածել, բայց եկեղեցական իշխանության կամքը լրիվ տարբեր կերպ դուրս եկավ, ի նպաստ իրեն չէր: Ինքն այլեւս փոխանորդ չէ, եկեղեցական է, որը պետք է եկեղեցական իշխանության որոշմանը ենթարկվի, մանավանդ Էջմիածնում Վեհափառ Հայրապետի հետ խոսեցինք, շատ հստակ ասվեց, ապա նաեւ հրապարակվեց, որ տեղապահի ընտրությունից հետո փոխանորդի աշխատանքն ավարտվում է, հետեւաբար, ստացվում է, որ ինքը եկեղեցական իշխանության կամքին չի փորձում հնազանդվել:

-Էջմիածնում կայացած հանդիպմանը Դուք էլ եք մասնակցել, միգուցե ճնշումնե՞ր են գործադրվել Աթեշյանի նկատմամբ:

-Հանդիպման ժամանակ շատ հստակ ասվել է՝ տեղապահի ընտրություն տեղի կունենա, ով որ կընտրվի, նախկին փոխանորդի պարտականությունները կավարտվեն, սրա մասին շատ հստակ խոսվել է, Վեհափառ Հայրապետն էլ այդ մասին հստակ հայտարարել է:

-Արամ Սրբազանը հայտարարում է նաեւ, որ Թուրքիայի պետությունն իրեն է ճանաչում որպես Պոլսո Հայոց պատրիարքի փոխանորդ:

-Հեքիաթ է, այդպիսի բան չկա, պետության հետաքրքրության առարկան, առանցքն Աթեշյանը չէ, առանցքը մեր պատրիարքական գործողություններն են: Աթեշյանն իրավունք չունի այդպիսի սխալ տեղեկություններ տալու, մանավանդ հանրության առջեւ:

-Նախապես հայտարարվել էր, որ դեկտեմբերի 13-ին պետք է պատրիարքի ընտրությունները տեղի ունենան, բայց չկայացան: Ո՞րն էր պատճառը:

-Նախաձեռնող խումբը նշել էր, որ նախատեսում են, հնարավոր է՝ այդ օրը լինեն ընտրությունները, այնտեղ որոշում չկար նշված, առաջարկ էր ընդամենը, որ եթե պետության արտոնությունը գրավոր կերպով ստանային, այդ օրն ընտրությունները նշանակեին: Գրավոր պատասխանը մենք կարող է՝ ստանանք հաջորդ շաբաթ կամ փետրվարին:

Նշենք, որ այս պահին Պատրիարքի ընտրություններին մասնակցելու համաձայնություն են տվել Արամ արքեպիսկոպոս Աթեշյանը, կրոնական ժողովի ատենապետ Տեր Սահակ եպիսկոպոս Մաշալյանը, Գերմանահայոց թեմի առաջնորդ Գարեգին արքեպիսկոպոս Բեկչյանը եւ Հայաստանից Գուգարաց թեմի առաջնորդ Տեր Սեպուհ արքեպիսկոպոս Չուլջյանը:

https://news.am/arm/news/427952.html