Օզդեմիր. Թուրքիայի կառավարությունը դերակատարում է ունեցել Հրանտ Դինքի սպանության գործում

Թուրքիայի կառավարությունը դերակատարում է ունեցել հայ լրագրող Հրանտ Դինքի սպանության գործում: Այս մասին DW-ի հետ հարցազրույցում ասել է Բունդեսթագի պատգամավոր, Կանաչների կուսակցության առաջնորդ Ջեմ Օզդեմիրը:

Ի պատասխան հարցին՝ ի՞նչ կարծիքի է Թուրքիայի խորհրդարանի պատգամավոր Կարո Փայլանի վերջերս արած հայտարարության մասին, որ երկրից փախած թուրք գիտնականներն ու լրագրողները վտանգի մեջ են, Օզդեմիրը նշել է, որ ինքը նման տեղեկություն չունի, բայց երեւույթն ինքնին իրեն չէր զարմացնի՝ հատկապես հաշվի առնելով այն, ինչ պատահեց Հրանտ Դինքի հետ:

«Մենք տեսնում ենք, թե թուրք այլախոհներն ինչպես են ոչ միայն բանտարկվում, այլեւ նրանց ստիպում են լռել կամ արտաքսում են, ինչպես նաեւ ահաբեկում ու ֆիզիկական բռնության ենթարկում: Գերմանիան պետք է այս մասին իմանա եւ առաջին հերթին կանխի առանձին կազմակերպությունների զարգացումը: Այդպիսի մի քանի օրինակներ արդեն կան, ինչպիսին է Osmanen Germania-ն՝ թուրքական ազգայնական բռնցքամարտի բանդան կամ Եվրոպացի թուրք դեմոկրատների միությունը (UETD)»,- հայտարարել է Օզդեմիրը:

Բունդեսթագի պատգամավորը պատմել է, որ վերջերս մի միջոցառման է մասնակցել, որը կազմակերպել էր հայազգի թուրք լրագրող Հայկո Բաղդատը, որը զրահաբաճկոնով էր, քանի որ նախօրեին սպառնալիքներ էր ստացել: «Մենք պետք է հասկացնենք, որ Գերմանիան չի հանդուրժի վախի նման մթնոլորտը: Շատ վատ է, որ թուրք հանրության շրջանում արդեն այդպիսի վախ է մտել»,- ընդգծել է նա:

https://news.am/arm/news/428238.html