Կիրօ Մանոյեան. «Մինչ ապրիլ ժամանակ կայ, բայց հայ-թուրքական արձանագրութիւնները վաւերացնելու ընթացքը Թուրքիան չի փոխի»

«Alikonline.ir» – ՀՅԴ Բիւրոյի անդամ, Բիւրոյի Հայ Դատի եւ քաղաքական հարցերի գրասենեակի պատասխանատու Կիրօ Մանոյեանը «Tert.am»-ի հետ զրոյցում անդրադառնալով Թուրքիայի ԱԳՆ–ի՝ ՀՀ արտգործնախարար Էդւարդ Նալբանդեանի յայտարարութեան արձագանքին, նկատեց, որ դա նշանակում է, որ հայկական կողմի ճնշումը Թուրքիան հարկադրւած զգում է եւ փորձում ինչ–որ բացատրութիւն տալ:

«Հետաքրքիր է, որ սեպտեմբերին ՀՀ նախագահի՝ ՄԱԿ-ի ամբիոնից արւած յայտարարութիւնը, որ հայ-թուրքական արձանագրութիւններն առ ոչինչ կը համարեն, եթէ Թուրքիան մինչեւ ապրիլ ամիս գործուն քայլեր չձեռնարկի, իրենք անտեսեցին։ Հիմա, երբ կրկնեց ԱԳ նախարարը, իրենք պարտաւորւած զգացին արձագանգել, իսկ դա նշանակում է, որ իրենք ճնշումը հարկադրւած զգացին եւ փորձում են ինչ-որ բացատրութիւն տալ»,- ասաց Մանոյեանը:

Նշենք, որ Թուրքիայի ԱԳՆ հաղորդագրութեան մէջ մասնաւորապէս նշւում է. «Չնայած Հայաստանի բացասական դիրքորոշմանը հայ-թուրքական արձանագրութիւնների վերաբերեալ՝ Թուրքիան հաւատարիմ է արձանագրութիւնների հիմնական դրոյթներին: Այս արձանագրութիւնները դեռեւս Թուրքիայի Ազգային մեծ ժողովի արտաքին հարցերով յանձնաժողովի օրակարգում են: Դրանց վաւերացման համար կարեւոր է, որ նպաստաւոր քաղաքական մթնոլորտը եւ խաղաղութիւնն ապահովւեն Հարաւային Կովկասում»:

Կիրօ Մանոյեանի խօսքով՝ պարզ էր, որ ՀՀ-ի կողմից արձանագրութիւններն առ ոչինչ յայտարարելու պատրաստակամութիւնից յետոյ Թուրքիան փորձելու էր ցոյց տալ, որ տեսէք՝ Հայաստանն է, մենք պատրաստ ենք, եւ այլն:

«Մենք՝ որպէս Դաշնակցութիւն, իհարկէ, դժգոհ չենք, որ Թուրքիան չի վաւերացրել հայ-թուրքական արձանագրութիւնները, եւ մենք էլ չենք վաւերացրել, բայց իրենց չվաւերացնելը ցոյց է տալիս, որ իրենք այս բանակցութիւններում անկեղծ չէին: Դրա համար էլ անհրաժեշտ է, եւ մենք էլ միշտ բարձրաձայնել ենք, որ Հայաստանն առ ոչինչ յայտարարի այդ արձանագրութիւնները, որովհետեւ Թուրքիայի պահւածքն անկեղծ չէր, այն իմաստով, որ իրենք փաստօրէն ՀՀ-ի հետ յարաբերութիւններ հաստատելու նպատակ չունէին»,- ասաց նա՝ նշելով, որ այդ յայտարարութիւններն ուղղւած են միջազգային հանրութեանը եւ նրանց, ովքեր ուզում են հասկանալ, թէ իրավիճակն ինչ է եւ Հայաստանին մեղադրեն, որ ՀՀ-ն էր առ ոչինչ յայտարարում:

ՀՅԴ քաղաքական գործչի խօսքով՝ այսօր ոչ իրաւականօրէն այդ արձանագրութիւնները չեն գործում եւ իրաւականօրէն էլ անհրաժեշտ է նաեւ դրանք առ ոչինչ յայտարարել:

«Այլապէս ինչ-որ վտանգ ներկայացնում են. միջազգային իրաւունքի մէջ, եթէ պայմանագիրը ստորագրւել է, թէկուզ չվաւերացւած, նաեւ ինչ-որ կեցւածք ու պարտաւորութիւն է ենթադրում, դրա համար անհրաժեշտ է, որ առ ոչինչ յայտարարւի»,- ասաց նա:

Չնայած Թուրքիայի նման արձագանգին, ըստ Կիրօ Մանոյեանի՝ արձանագրութիւնները չվաւերացնելու ընթացքը չի փոխւում:

«Այսինքն՝ յոյս ունեմ այդպէս չի լինի, որ պատճառ հանդիսանայ ՀՀ-ին իր վերջնաժամկէտ դիրքորոշումից յետ կանգնել։ Բայց կարծում եմ, որ Նախագահն իր այդ յայտարարութիւնը վերատեսութեան կենթարկի, եթէ օրինակ յունւարի 16-ին, կամ մարտի 23-ին, այսինքն` մինչեւ ապրիլ ընկած ժամանակահատւածում մի օր Թուրքիայի խորհրդարանը յայտարարի, որ վաւերացրեցինք»,- ասաց նա:

Իսկ թէ յանձնաժողովում դրական եզրակացութիւն ստանալուց յետոյ եթէ հարցը մտնի խորհրդարան, այդ դէպքում եւ՞ս ժամկէտները երկարաձգելու միտում չի տեսում, Կիրօ Մանոյեանը նշեց, որ ոչ. «Այստեղ էլ օրակարգային հարց է, բայց մինչեւ ապրիլ ժամանակ կայ»։

Ըստ նրա, չնայած դրան, այս յայտարարութիւնն էլ հիմք չի տալիս ենթադրել, որ Թուրքիան մտադիր է վաւերացնել արձագանգրութիւնները:

«Այս յայտարարութեամբ ասում է՝ մեր նպատակը եղել է ՀՀ-ի հետ յարաբերութիւնների նորմալացումը, միեւնոյն ժամանակ ասում են, որ նպատակն է Հարաւային Կովկասում ստեղծել կայունութիւն եւ խաղաղութիւն՝ հիմնւած Ադրբեջանի տարածքային ամբողջականութեան վրայ: Կարծում եմ՝ մինչեւ մարտի 31-ը նման իրավիճակ Հարաւային Կովկասում չի ստեղծւի»,- եզրափակեց նա:

Alikonline.ir