Էրդողանը հայտարարել է, որ թուրքական ԶՈւ-ն կմտնի ոչ միայն սիրիական Աֆրին, այլև Ղամիշլի

Թուրքիայի նախագահ Ռեջեփ Թայիփ Էրդողանը հայտարարել է, որ թուրքական ԶՈւ-ն «կմաքրի» ահաբեկիչներին Սիրիայի հյուսիսից՝ խոսելով ոչ միայն Աֆրինի ու Մանբիջի, այլև Ղամիշլիի մասին, այս մասին տեղեկանում ենք «Բիրգյուն» պարբերականից:

«Ահաբեկիչներից կմաքրենք Աֆրինը, Մանբիջը, Թել Աբյադը, Ղամիշլին: Ահաբեկիչներին, որոնց երես են տալիս մեր ռազմավարական դաշնակիցը համարվողները, ինչպես այսօր, այնպես էլ միշտ, նեղը կգցենք: Մենք դժվարանում ենք հասկանալ, թե այս հարցում ի՞նչ կա մեր դաշնակցի մտքին, սակայն մեր որոշումը հստակ է. ոչ ոք թող չնեղանա, ով մեր դիմաց դուրս գա՝ գլուխը կճզմենք կանցնենք վրայով», – հայտարարել է Էրդողանը՝ խոսելով Սիրիայի տարածքում գործող քրդական զինված ջոկատների (YPG) մասին, որոնք վայելում են ԱՄՆ-ի աջակցությունը:

Նշենք, որ Սիրիայի հյուսիսում գտնվող Ղամիշլին ունի մեծաթիվ հայ համայնք:

Ավելի վաղ Էրդողանը, խոսելով Սիրիայի հյուսիսում գտնվող Աֆրին քրդաբնակ շրջանի մասին, ասել էր, որ իրենք չեն կարող անտեսել այդ կողմի՝ իրենց սահմանների համար ներկայացրած վտանգն ու չեն վարանի անհրաժեշտ քայլերը ձեռնարկելու հարցում:

Էրդողանը նաև հայտարարել էր, որ Սիրիայի հյուսիսային Աֆրին շրջանում իրականացվելիք ռազմական գործողության շրջանակում սերտորեն կհամագործակցեն Ռուսաստանի հետ:

Հիշեցնենք, որ Աֆրինի հարցը քննարկման է դրվել վերջերս Սոչիում կայացած Ռուսաստան-Իրան-Թուրքիա եռակողմ գագաթնաժողովին:

http://www.tert.am/am/news/2017/12/18/erdogan/2567953