«Եթե մենք կորցնենք Երուսաղեմը, կկորցնենք նաև Մեքքան ու Մեդինան». Էրդողան

Թուրքիայի նախագահ Ռեջեփ Թայիփ Էրդողանը մտավախություն է հայտնել, որ Երուսաղեմը կորցնելուց հետո մահմեդականները կարող են կորցնել նաև սրբավայրեր հանդիսացող Մեքքան ու Մեդինան։ Այդ մասին նա ասել է թուրքական NTV հեռուստաալիքի եթերում։
«Եթե մենք կորցնենք Երուսաղեմը, ապա մենք չենք կարող պաշտպանել Մեդինան։ Եթե կորցնենք Մեդինան, կկորցնենք նաև Մեքքան ու Քաաբան»,- ասել է Թուրքիայի առաջնորդը։
Ավելի վաղ հաղորդվել էր, որ Թուրքիայի արտաքին գործերի նախարարության պաշտոնական կայքում Երուսաղեմը գրանցվել է որպես Պաղեստինի մայրաքաղաք:
Արված փոփոխությանը կից կայքում տեղ է գտել նաև հետևյալ հայտարարությունը. «Մեր երկրում 2017 թ. տեղի ունեցած Իսլամական համագործակցության կազմակերպության արտահերթ գագաթնաժողովի ժամանակ Երուսաղեմը հռչակվել է Պաղեստինի մայրաքաղաք»:
Հիշեցնենք, որ Թուրքիայի նախագահ Ռեջեփ Թայիփ Էրդողանը հանդես էր եկել դեկտեմբերի 13-ին Ստամբուլում Իսլամական համագործակցության կազմակերպության երկրների առաջնորդների արտահերթ գագաթնաժողովի հրավիրման նախաձեռնությամբ՝ ԱՄՆ-ի կողմից Երուսաղեմն Իսրայելի մայրաքաղաք ճանաչելու մտադրության առնչությամբ:
Դեկտեմբերի 6-ին ԱՄՆ նախագահ Դոնալդ Թրամփը հայտարարել է Երուսաղեմն Իսրայելի մայրաքաղաք ճանաչելու և ամերիկյան դեսպանատունը Թել Ավիվից այնտեղ տեղափոխելու մասին, ինչի հետևանքով բախումներ են տեղի ունեցել մահմեդականների և հրեաների միջև:

http://www.tert.am/am/news/2017/12/16/erdogan-medina/2566890