Թուրքիայի ԱԳՆ-ը պատասխանել է արձանագրությունները չեղարկելու Երեւանի որոշմանը

Թուրքիայի ԱԳՆ–ն արձագանքել է հայ–թուրքական արձանագրությունները վերջնական չեղարկելու մասին Հայաստանի արտգործնախարար Էդվարդ Նալբանդյանի հայտարարությանը։ Թուրքիայի ԱԳՆ–ի տարածած հայտարարության մեջ նշվել է, որ Էդվարդ Նալբանդյանի հայտարարությունը, թե Թուրքիան չի կատարում արձանագրություններով ստանձնած պարտականությունները, իբր միջազգային հանրության մոլորեցնելու փորձ է։

Հայտարարության մեջ զարմանալիորեն պնդում է արվում, թե իբր Հայաստանն է առկախել արձանագրությունները, իսկ Թուրքիան հավատարիմ է արձանագրություններում առկա պարտավորություններին:

Զավեշտալի է նաեւ, որ սրանով հանդերձ Թուրքիայի ԱԳՆ-ն նույն հայտարարության մեջ կրկին արձանագրությունների իրականացումը կապել է Արցախի խնդրի լուծման հետ։

Հայտարարության մեջ պարզ է դարձել, որ Թուրքիայում կրկին շատ ծանր են տարել Հայաստանի ԱԳ նախարարի խոսքերը՝ Հայոց ցեղասպանության հետ կապված։ Մասնավորապես, հայտարարության մեջ կրկին փորձում են ժխտել Հայոց ցեղասպանության փաստը՝ պնդելով, թե իբր Հայաստանն այն բանեցնում է Թուրքիայի վրա ճնշում գործադրելու համար։

Նշենք, որ Հունաստան կատարած այցի ժամանակ Հայաստանի ԱԳ նախարարը հայտարարել էր, թե Թուրքիան առ այսօր ոչինչ չի արել հայ-թուրքական արձանագրությունները կյանքի կոչելու ուղղությամբ, ավելին` անհիմն նախապայմաններ է առաջ քաշել, ուստի Հայաստանը 2018-ի գարունը կդիմավորի առանց այդ արձանագրությունների։

http://artsakhpress.am/arm/news/77829/turqiayi-agn-y-pataskhanel-e-ardzanagrutyunnery-chexarkelu-erevani-oroshmany.html