Եթե պետությունը չմիջամտեր, այս շաբաթ կկայանար Պոլսո Հայոց պատրիարքի ընտրությունը. «Ակօս»

«Այս շաբաթ նոր պատրիարքն արդեն կարող էր ընդունել շնորհավորանքները: Ցավոք, դա այդպես էլ տեղի չունեցավ: Հրապարակված որևէ պաշտոնական հայտարարություն չկա, սակայն ընտրությունների անցկացման համար պատրիարքարանի կողմից Ստամբուլի նահանգապետարան ու երկրի ներքին գործերի նախարարություն ուղարկված նամակն այդպես էլ պատասխան չի ստացել», – գրում է պարբերականը:

«Ակօսի» խմբագրակազմի անունից պարբերականում հրապարակված անդրադարձում կրկին հարց է ուղղվել երկրի իշխանություններին՝ ինչու Թուրքիայի հայ համայնքին թույլ չի տրվում ընտրել իր պատրիարքին այն դեպքում, երբ Թուրքիայի նախագահ Ռեջեփ Թայիփ Էրդողանը Հունաստան կատարած այցի ժամանակ հայտարարեց, թե Արևմտյան Թրակիայի մահմեդականները չեն կարողանում հոգևոր առաջնորդ ընտրել, և դա Հունաստանի կողմից Լոզանի պայմանագրի կոպիտ խախտում է:

Օրեր առաջ Թուրքիայի ՆԳՆ-ին նույն հարցն ուղղել էր Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը:

Մեջլիսյան իր հերթական ելույթի ժամանակ նա խնդրել էր երկրի ՆԳ նախարարին պատասխանել հարցին, թե որն է ընտրական գործընթացի ձգձգման իրական պատճառը, ինչ հիմքով է պետությունն իրականացնում այդ միջամտությունն ու երբ է վերջ դնելու Պոլսո Հայոց պատրիարքի ընտրությունը խոչընդոտելուն:

http://www.tert.am/am/news/2017/12/14/armenian-patriarch/2565450