Փայլանը մեղադրել է Թուրքիային՝ փոքրամասնությունների հանդեպ Լոզանի պայմանագրով նախատեսված պարտականությունները չկատարելու համար

Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը մեղադրել է իշխանություններին երկրում բնակվող փոքրամասնությունների՝ Լոզանի պայմանագրով նախատեսված իրավունքները չպահպանելու ու նրանց հանդեպ ստանձնած պարտավորությունները չկատարելու համար:
Ինչպես տեղեկանում ենք հայազգի պատգամավորի Twitter-յան պաշտոնական էջից, Փայլանը քննադատել է Թուրքիայի նախագահ Ռեջեփ Թայիփ Էրդողանի հունաստանյան ելույթը, որի ժամանակ Թուրքիայի ղեկավարը մեղադրել էր Հունաստանի իշխանություններին տեղի մահմեդական համայնքի հանդեպ խտրական վերաբերմունքի համար:
«Ասում եք՝ «Արևմտյան Թրակիայում մահմեդականներն իրենց հոգևոր առաջնորդին չեն կարողանում ընտրել, և դա հակասում է Լոզանի պայմանագրին»: Դե ուրեմն մի նկատառում էլ իմ կողմից. Թուրքիայի հայերը տարիներ շարունակ պետության միջամտության պատճառով չեն կարողանում ընտրել իրենց պատրիարքին: Հոգևոր դպրոցները փակվում են, պատրիարքարանը պաշտոնական կարգավիճակ չունի… Էլի՞ թվարկեմ», – գրել է Փայլանը:
Հիշեցնենք, որ Էրդողանը Հունաստան այցից ժամեր առաջ հունական Skai հեռուստաալիքին տված հարցազրույցում հայտարարել էր, որ Լոզանի խաղաղության պայմանագիրը վերանայման կարիք ունի:
Լոզանի պայմանագիրը, ի թիվս այլ հարցերի, սահմաններ է հաստատում երկու երկրների միջև և սահմանում Էգեյան ծովում կղզիների նկատմամբ Հունաստանի իրավունքները:
Լոզանի պայմանագիրը 1923 թ. հուլիսի 24-ին կնքված հաշտության պայմանագիր է՝ 8 ամիս տևած Լոզանի կոնֆերանսի հիմնական ավարտական փաստաթղթերից մեկը։ Այն պաշտոնապես հանգուցալուծեց Մերձավոր Արևելքում 1919-1922 թվականներին առկա հակամարտությունը, մասնավորապես՝ թուրք-հունական պատերազմը:

http://www.tert.am/am/news/2017/12/11/paylan/2562041