Էրդողանը տարածաշրջանային տնտեսական նախագծերից հետագա դուրսմղմամբ է սպառնացել Հայաստանին

Թուրքիայի նախագահ Ռեջեփ Թայիփ Էրդողանը տարածաշրջանային տնտեսական նախագծերից հետագա դուրսմղմամբ է սպառնացել Հայաստանին: Այդ մասին նա հայտարարել է երկրի իշխող Արդարություն և զարգացում կուսակցության համաժողովի ժամանակ, գրում է թուրքական Haberler լրատվամիջոցը:
Ինչպես նշել է Էրդողանը, «հայկական սփյուռքի ճնշման տակ պաշտոնական Երևանը շարունակում է փակ պահել Թուրքիայի հետ բարեկամության դռները»:
«Արդյունքում՝ Հայաստանը դուրս է մղված տարածաշրջանում տրանսպորտային, առևտրային և էներգետիկ նախագծերից: Եվ ավելին, այն շարունակում է մնալ և մնալու է մեկուսացման մեջ»,- ասել է նա՝ հավելելով, որ ի հակակշիռ Հայաստանի՝ Վրաստանը դարձել է մի կողմից Թուրքիայի և Արևմուտքի, մյուս կողմից՝  Կովկասի տարածաշրջանի և Միջին Ասիայի միջև կամուրջ:
«Այս երկու օրինակները շատ ցուցադրական են: Մեզ հետ բարեկամություն անողը շահում է, իսկ ոխ պահողը՝ կորցնում»,- ընդգծել է Թուրքիայի նախագահը:
Նա նաև նշել է, որ Վրաստանի և այլ հարևանների հետ սերտ համագործակցությունը ցույց է տվել Անկարայի ցանկությունը՝ կարգավորել հարևանների հետ իր հարաբերությունները:

http://www.tert.am/am/news/2017/12/04/erdogan/2556204