Թուրքիայում քննադատել են ԱՄՆ-ի՝ Երուսաղեմը Իսրայելի մայրաքաղաք ճանաչելու մտադրությունը

Եթե Ամերիկայի Միացյալ Նահանգները Երուսաղեմը ճանաչի Իսրայելի մայրաքաղաք, ապա դա կլինի աղետ, և տարածաշրջանում քաոս կտիրի: Այս մասին հայտարարել է Թուրքիայի փոխվարչապետ Բեքիր Բոզդաղը:

Ավելի վաղ հաղորդվել է, որ Միացյալ Նահանգների նախագահ Դոնալդ Թրամփը դեռևս որոշում չի կայացրել՝ ճանաչել Երուսաղեմը Իսրայելի մայրաքաղաք, թե ոչ:

«Եթե Երուսաղեմի կարգավիճակը փոփոխվի, ապա աղետ կլինի, այն նոր քաոսի ճանապարհ կբացի: Ոչ ոք դրանից օգուտ չի ստանա՝ ո՛չ Իսրայելը, ո՛չ այլ երկրներ, ո՛չ էլ ամբողջ տարածաշրջանը: Թուրքիան հենց սկզբից կողմ է եղել նրան, որ Երուսաղեմի կարգավիճակը մնա միջազգային պայմանավորվածությունների շրջանակներում: Մենք այդ քաղաքականությունից չենք հրաժարվում, ուշադիր հետևում ենք իրադարձությունների զարգացմանը»,-Թուրքիայի մայրաքաղաք Անկարայում լրագրողներին հայտնել է Բոզդաղը:

Միացյալ Նահանգների կոնգրեսը դեռևս 1995 թ-ին ընդունել է օրենք՝ Իսրայելում դեսպանատունը Թել-Ավիվից Երուսաղեմ տեղափոխելու մասին: Սակայն քաղաքի վիճարկային կարգավիճակի և արաբամահմեդական աշխարհի համար այդ խնդրի զգայունության պատճառով ամերիկյան բոլոր նախագահները յուրաքանչյուր վեց ամիսը մեկ ստորագրում են այդ որոշման իրականացումը հետաձգող փաստաթուղթ:

Իսրայելը Երուսաղեմը հայտարարել է որպես իր «միասնական և անբաժան» մայրաքաղաք՝ այդ թվում նրա արևելյան շրջաններն ու պատմական կենտրոնը՝ դեռևս կես դար առաջ Հորդանանից խլված և հետագայում անեքսիայի ենթարկված:

Աշխարհը չի ճանաչում անեքսիան և քաղաքի կարգավիճակը համարում է մերձավորարևելյան հակամարտության հիմնական խնդիրներից մեկը, որը պետք է լուծվի պաղեստինցիների հետ համաձայնության ճանապարհով, ովքեր հավակնում են Երուսաղեմի արևելյան մասին: Այդ առնչությամբ բոլոր օտարերկրյա դեսպանությունները տեղակայված են Թել-Ավիվում:

http://ankakh.com/article/86152/%E2%80%8Bthurqiayum-qnnadatyel-yen–amn-i%D5%9D–yerusaghyeme-israyyeli–mayraqaghaq-tjanachyelu–mtadruthyune