Կարո Փայլանին անձեռնմխելիությունից զրկելու, պատգամավորական մանդատը խլելու մասին նոր պահանջ չկա. պատգամավորի խոսնակ

Թուրքիայի Ժողովրդադեմոկրատական կուսակցության (HDP) անդամ, խորհրդարանի հայազգի պատգամավոր Կարո Փայլանի անձեռնմխելիությունը չեղարկելու կամ նրան պատգամավորական մանդատից զրկելու մասին նոր պահանջ Թուրքիայի գլխավոր դատախազությունը չի ներկայացրել: Այս մասին Tert.am-ին տեղեկացրեց հայազգի պատգամավորի մամուլի խոսնակ Թամար Նալջըն՝ հերքելով մամուլում տարածված լուրերը:

Ավելի վաղ թուրքական T24 կայքը հայտնել էր, որ դատախազությունը խորհրդարանի 2 ընդդիմադիր կուսակցությունների 121 պատգամավորի անձեռնմխելիությունից զրկելու մասին դիմում է հղել Արդարադատության նախարարություն ու խորհրդարանի ղեկավարությանը: Նշված ցուցակում, սակայն, Կարո Փայլանի անունը չկա:

Թամար Նալջըն հայտնեց, որ մինչ այս Փայլանին անձեռնմխելիությունից կամ մանդատից զրկելու մասին երեք տարբեր պահանջ ներկայացված եղել է, սակայն դրանք դեռևս մնում են չբավարարված:

Ընդդիմադիր մի շարք պատգամավորների անձեռնմխելիությունից զրկելու մասին թեման կրկին օրակարգային դարձավ, երբ երկրի գլխավոր ընդդիմադիր ուժը համարվող Ժողովրդահանրապետական կուսակցության նախագահ Քեմալ Քըլըչդարօղլուն հրապարակայնորեն ներկայացրեց Թուրքիայի նախագահ Ռեջեփ Թայիփ Էրդողանի ու նրա ընտանիքի անդամների՝ օֆշորային ընկերությունների հետ կապն ապացուցող փաստաթղթերը:

Դրանից հետո Թուրքիայում հետաքննություն է սկսվել Ժողովրդահանրապետական կուսակցության խորհրդի անդամների՝ այդ թվում Քեմալ Քըլըչդարօղլուի հանդեպ: Հայտնի է, որ եթե խորհրդարանում ընդդիմադիր կուսակցության անդամներին անձեռնմխելիությունից զրկելու մասին նոր որոշում կայացվի, Քըլըչդարօղլուն և նրա թիմակիցները ստիպված կլինեն կանգնել դատարանի առաջ:

http://hayernaysor.am/archives/267637