Պոլսո Հայոց պատրիարքի տեղապահ Գարեգին արքեպիսկոպոս Բեկչյանը, որը նաև Գերմանիայի հայ համայնքի հոգևոր առաջնորդն է շարունակում հանդիսանալ, զրուցել է թուրք հեղինակ Քեմալ Յալչընի հետ, որը Բեկչյանի հետ իր հարցազրույցը կիսել է Ստամբուլի հայկական պարբերականներից «Ակօսի» էջերում:
Պատրիարքի տեղապահը նկատել է, որ վերջին շրջանում Թուրքիայի հայ համայնքի ու թուրքական իշխանությունների միջև հարաբերություններն առավել կայուն կերպով են զարգանում և նույնիսկ արձանագրել է որոշակի դրական տեղաշարժ:
«Այո, կան որոշ դրական տեղաշարժեր: Հարաբերություններն այժմ առավել կայուն վիճակում են: Պետությունը ոչ միայն հայկական, այլև մյուս փոքրամասնությունների հետ էլ է փորձում լավ հարաբերություններ ստեղծել», – ասել է Բեկչյանը՝ որպես դրական տեղաշարժ ընդգծելով ավելի վաղ պետության կողմից բռնագրավված համայնքային մի շարք շինությունների ու տարածքների՝ հայ համայնքին վերադարձնելու փաստը:
Շեշտելով, որ դա, այնուամենայնիվ, նախկինում բռնագրավված համայնքային գույքի միայն մի մասն է, Բեկչյանը նշել է, որ իշխանությունները որոշակի խոստումներ են տվել ևս մի քանի բռնագրավված շինությունների վերադարձի հետ կապված:
Ըստ Բեկչյանի՝ սա առավելապես կարևոր է այն իմաստով, որ հետ ստացած շինությունների ու տարածքների հաշվին համայնքը կարողանում է որոշ չափով փոխհատուցել Ստամբուլի հայկական դպրոցների բյուջետային ծախսերի մի մասը:
Գարեգին արքեպիսկոպոս Բեկչյանը, պատասխանելով պատրիարքական ընտրությունների անցկացման ու իր հետագա անելիքների մասին հարցին, նշել է, որ պատրիարքարանն այս փուլում սպասում է Ստամբուլի նահանգապետարանի ու երկրի ներքին գործերի նախարարության համապատասխան թույլտվությանը:
Պոլսո Հայոց պատրիարքի տեղապահը հայտնել է, որ շուրջ կես դար անց սիրով է վերադարձել իր ծննդավայր՝ Ստամբուլ, ու կյանքի մնացած հատվածը ցանկանում է անցկացնել պոլսահայ համայնքին ծառայելով:
Բեկչյանը պատմել է նաև իր կողմից պատրաստվող հայերեն-թուրքերեն և թուրքերեն-հայերեն հատուկ բառարանի մասին, որի վրա աշխատում է ավելի քան 20 տարի և որը կներառի ավելի քան 40 000 բառ:
Ավելի վաղ նա թարգմանել է Քեմալ Յալչընի՝ «Քեզ հետ սիրտս ծիծաղում է» և «Սարի աղջիկ» գրքերը:
«Եթե նույնիսկ պատրիարք չդառնամ՝ կապրեմ Ստամբուլում: Եթե չընտրվեմ էլ՝ ժամանակիս մեծ մասը կրկին Ստամբուլում կանցկացնեմ: Ժամանակիս մեծ մասը նախատեսում եմ ծախսել մշակութային նախագծերի, թարգմանություններիս վրա: Մտորում եմ այլևս մինչև կյանքիս վերջ Ստամբուլում, Թուրքիայում մնալու մասին»,- եզրափակել է պատրիարքի տեղապահը:
Leave a Reply