Ապրիլի 24-ի կապակցությամբ Օբամայի հայտարարությունը որեւէ փաստ չի հերքում. ԱՄՆ դեսպան

Նախագահ Բարաք Օբամայի ամենամյա հայտարարությունը՝ կապված ապրիլի 24-ի Հայոց ցեղասպանության զոհերի հիշատակման հետ, ուժեղ հայտարարություն է, որը որեւէ փաստ չի հերքում: Այս մասին հայտարարել է Հայաստանում ԱՄՆ դեսպան Ջոն Հեֆֆերնը՝ Յեյլի համալսարանի «The Politic» ամսագրին տված հարցազրույցում:

«Այնտեղ հստակ ասվում է, որ Օսմանյան կայսրության վերջին օրերին 1.5 մլն հայ է սպանվել: Հայտարարությունը վկայակոչում է այդ գործողությունները՝ որպես 20-րդ դարի ամենավայրագ գազանություններից մեկը: Հայտարարությունում ճանաչվում են փաստեր եւ, մեր կարծիքով, դրանում փաստերի վերաբերյալ վիճելի հարցեր չկան»,-ընդգծել է դեսպանը:

Նրա խոսքով՝ այն բնորոշումը, որը ԱՄՆ կառավարությունը տալիս է այդ իրադարձությունների համար, քաղաքական որոշում է, որը ներառում է մի շարք իրավական եւ քաղաքական գործոններ, որոնցից մեկը Հայաստանի եւ Թուրքիայի հարաբերությունների կարգավորումն է: «Իհարկե, Հայաստանին պետք է Թուրքիայի հետ բաց սահման: Մասնակի մեկուսացումը մեծ վնաս է հացնում պետականությանն ու տնտեսությանը: ԱՄՆ քաղաքականությունն ուղղված է Հայաստանի եւ Թուրքիայի հաշտեցմանը: Այդ կերպ նախագահը եւ նախկին ու ներկայիս պետքարտուղարները ընտրում եւ օգտագործում են այնպիսի բառեր, որոնք, ինչպես նրանք են կարծում, կնպաստեն հաշտեցմանը»,-ընդգծել է դեսպանը՝ մեկնաբանելով նախագահի՝ ապրիլի 24-ի վերաբերյալ ամենամյա հայտարարության խոսքերի ընտրությունը:

http://news.am/arm/news/168423.html