Թուրքիան կմիանա Սիրիայի գործող ռեժիմի դեմ ցանկացած կոալիցիայի

Թուրքիան կմիանա Սիրիայի գործող ռեժիմի դեմ ցանկացած միջազգային կոալիցիայի, նույնիսկ ՄԱԿ-ի Անվտանգության խորհրդի պաշտոնական որոշման բացակայության դեպքում։ Այս մասին ասել է Թուրքիայի արտգործնախարար Ահմեթ Դավութօղլուն, հաղորդում է Reuters-ը:

«36-37 երկիր քննարկում է այլընտրանքային տարբերակներ: Եթե այս ընթացքում կոալիցիա կազմվի Բաշար ալ-Ասադի դեմ, Թուրքիան իր տեղը կզբաղեցնի այդտեղ»,- հայտարարել է Դավութօղլուն:

Թուրքիան Սիրիայի նախագահ Բաշար ալ-Ասադի քննադատներից է երկուսուկես տարվա հակամարտության ընթացքում՝ ապաստան տալով կես միլիոն փախստականների: Երկրի իշխանությունները բազմիցս քննադատել են միջազգային հանրությանը վճռորոշ դիրքորոշում չընդունելու համար: ՄԱԿ-ի Անվտանգության խորհրդին չի հաջողվել որոշում ընդունել՝ վետոյի իրավունք ունեցող Ռուսաստանի և Չինաստանի պատճառով:

«Ի սկզբանե, Թուրքիան պնդել է, որ միջազգային հանրությունը չպետք է կողքից պարզապես դիտի Ասադի ռեժիմի ոճրագործությունները: Նրանք, ովքեր մարդկության դեմ հանցագործություններ են իրականացնում, պետք է պատժվեն»,- ասել է Դավութօղլուն:

http://www.tert.am/am/news/2013/08/26/turkey-syria-coalition/