Վանա լճում գտնվող Աղթամար կղզու Սուրբ Խաչ եկեղեցում վերանորոգումից հետո այս տարի արդեն 4-րդ անգամ մատուցվելիք պատարագին առաջին անգամ կկազմակերպվի նաև հավաքական մկրտության արարողություն:
Թուրքական «Իհլաս» լրատվական գործակալության փոխանցմամբ` Աղթամար կղզու վրա գտնվող Սուրբ Խաչ եկեղեցում այս տարի նախատեսվող պատարագի արարողության բոլոր նախապատրաստական աշխատանքները հասել են վերջին փուլին: Վանի փոխնահանգապետ Մեհմեդ Յուզերի նախագահությամբ պատարագի կապակցությամբ կայացել է նիստ, որին մասնակցել են նաև համապատասխան հաստատությունների տնօրենները: Նիստի ժամանակ հաղորդվել է, որ 2013 թ. սեպտեմբերի 8-ին` կիրակի օրը, ժամը 11:00-ին նախատեսվող պատարագի շրջանակներում առաջին անգամ կկազմակերպվի նաև հավաքական մկրտություն:
Նախատեսվող պատարագի վերաբերյալ «Իհլաս» գործակալության թղթակցին հարցազրույց տված Վան նահանգի մշակույթի և զբոսաշրջության տնօրեն Մուզաֆֆեր Աքթուղը նախապատրաստական աշխատանքների մասին նշել է. «Ներկայում ոչ մի խնդիր չկա: Մեր նպատակն է լավագույն կերպով հյուրընկալել պատարագի մասնակիցներին: Խաղաղության գործընթացը, ինչպես մյուս ոլորտների դեպքում, զբոսաշրջության վրա էլ է դրական ներգործել: Շրջան այցելած զբոսաշրջիկների թիվն ավելացել է: Ակնկալում ենք, որ պատարագին մասնակիցների թիվն էլ, անցյալ տարվա համեմատ, ավելի մեծ կլինի»:
Akunq.net
Leave a Reply