Առաջին անգամ կբացվի ցեղասպանություն իրագործած Թուրքիայի ծաղրանկարների ցուցահանդես

Հայոց ցեղասպանության թանգարան–ինստիտուտն առաջին անգամ կկազմակերպի ժամանակավոր ցուցադրություն, որում կներկայացվեն մինչ օրս անհայտ հարյուրավոր բնօրինակ նմուշներ` ծաղրանկարներ, փոստային բացիկներ, պաստառներ և այլ նյութեր, որոնք տարբեր պատկերագրական ներկայացումներով դատապարտում են Թուրքիան, որպես ցեղասպանություն իրագործած երկիր: Ինչպես  տեղեկացնում է Հայոց ցեղասպանության թանգարան–ինստիտուտի լրատվական ծառայությունից, ցուցադրությունը կիրականացվի 2014 թվականի ապրիլին:

Առաջին աշխարհամարտի տարիներին և դրանից հետո հայերի դեմ թուրքական կառավարության կողմից իրագործված զանգվածային կոտորածները որակվեցին որպես «մարդկության և քաղաքակրթության դեմ ուղղված հանցագործություն»: Երիտթուրքերի ցեղասպանական քաղաքականությունը դատապարտվեց բազմաթիվ երկրների կառավարությունների, կազմակերպությունների և անհատ գործիչների կողմից: Տարբեր երկրների մամուլի էջերում, ի թիվս բազմահազար հրապարակումների, տպագրվեցին նաև տարաբնույթ ծաղրանկարներ, թողարկվեցին հարյուրավոր քարոզչական բացիկներ և պաստառներ, որոնց բովանդակությունը խոսուն վկայություն է Առաջին աշխարհամարտի տարիներին թուրքական կառավարության կողմից իրագործված ցեղասպանության և դրա դատապարտման մասին:

http://times.am/?p=30397&l=am