Արդվինի Իշխան կամ «Արյունոտ վանքը» վերականգնվում է

Արդվինի Իշխան գյուղում (ներկայիս Թուրքիայի տարածք) մի շինություն կա, որի անունը շատերս ենք լսել, բայց չենք տեսել, որտեղ ամեն տարի բազմաթիվ օտարերկրյա զբոսաշրջիներ են այցելում՝ դրա ճարտարապետությունն ու զարդարանքը տեսնելու համար, իսկ տեսնողները միշտ հիանում են, գրում է evrensel.net-ը։

Տարիների ընթացքում վնասված եկեղեցին սկսել է վերանորոգվել՝ Թուրքիայի Մշակույթի և զբոսաշրջության նախարարության նախաձեռնությամբ։

Արդվինի զբոսաշրջության համար շատ կարևոր այս եկեղեցին կառուցվել է 7-րդ դարում։ Դարերի ընթացքում վնասված եկեղեցու փոխարեն 9-րդ դարի առաջին կեսին կառուցվել է այն վանքը, որը կանգուն է մինչ այժմ։

Այս վանքը տեսնելու համար ամեն տարի բազմաթիվ զբոսաշրջիկներ են ժամանում, ինչը զգալի օգուտ է տալիս նաև գյուղի բնակիչներին։

Այս վանքն անվանում են նաև Արյունոտ վանք։ Համաձայն ավանդության՝ շինության կառուցումը 8 տարի է տևել և շատ դժվարությամբ է ընթացել։ Ի վերջո եկեղեցու շինարարության նյութական կողմն իր վրա է վերցրել Սմբատ Բագրատունի արքայի դուստրը։

1915թ. Հայոց ցեղասպանությունից հետո, բազմաթիվ եկեղեցիների նման, 40 տարի շարունակ բանակի կողմից ախոռի է վերածված եղել։

Տարիների ընթացքում  լքված ու վնասված եկեղեցու մասին հոգ է տանում 60-ամյա մի կին՝ Հաթուն Գյորգյունենը, ով չնայած մուսուլման լինելուն՝ առանց որևէ փոխհատուցման կատարում է այդ գործը։

Տեղեկացնենք, որ եկեղեցին վիճելի է համարվում. թուրք և վրացի որոշ պաշտոնյաներ պնդում են, որ այն վրացական ծագում ունի, սակայն եկեղեցու ճարտարապետությունն ու հայկական անվանումը խոսում է դրա հայկական պատկանելության մասին։

 http://www.tert.am/am/news/2013/08/22/artvin-church/