Մարութա Սուրբ Աստվածածին եկեղեցին ցանկանում են վերանորոգել

Մարութա Սուրբ Աստվածածին եկեղեցին, որի մի մասն ավերվել էր անցյալ տարի, կվերանորոգվի։ Սասունի հայերի միության նախագահ Ազիզ Դաղջըն մի խումբ մարդկանց, այդ թվում՝ ճարտարապետների հետ բարձրացել է  2.973 մետր բարձրության վրա գտնվող եկեղեցին, տեղեկացնում է «Հայ թերթը»։

Եկեղեցու փլված հատվածը վերակառուցելու համար դիմել են Բաթմանի նահանգապետարանին, Մշակույթի և զբոսաշրջության վարչությանը և Դիարբեքիրի մշակութային արժեքների պահպանության վարչությանը։

Վերանորոգման համար թույլտվություն ստանալուց հետո, Սասունի հայերի միությունը փորձելու է եկեղեցին նախկին տեսքի բերել հիմնադրամի միջոցներով։

9-րդ դարում կառուցված հայկական պատմական սրբավայրերից մեկի՝ Մարութա լեռան Սուրբ Մարիամ Աստվածածին եկեղեցու վերանորոգման աշխատանքները նախատեսում են ավարտել մեկ ամսում։

«Մարութա լեռան եկեղեցին շատ կարևոր է մեզ համար։ Մոտ մեկ տարվա ընթացքում դիմել ենք բոլոր պատկան մարմիններին։ Եկեղեցու վերանորոգման համար օժանդակություն ենք ստանալու շրջակա գյուղերի բնակիչներից։ Վերանորոգման աշխատանքների ավարտից հետո, Ստամբուլից կանչված քահանայի օգնությամբ նախատեսում ենք պատարագ մատուցել»,-ասել է Դաղջըն՝ հավելելով, որ եթե դեպի վանք տանող ճանապարհն էլ վերանորոգվի, ապա հաջորդ տարվա հուլիսին հարյուրավոր զբոսաշրջիկներ կգան Սասուն։

 http://www.tert.am/am/news/2013/08/20/maruta-astvatsatsin/