Թուրքագետ. Ղարաբաղյան հարցում Թուրքիան ադրբեջանական կողմի հռետորաբանությունն է օգտագործում

Թուրքիայի նախագահ Աբդուլահ Գյուլի եւ արտգործնախարար Ահմեդ Դավութօղլուի հայտարարությունները պետք է դիտարկվեն որպես Թուրքիայի եւ Ռուսաստանի միջեւ աշխարհաքաղաքական մրցակցության նոր դրսեւորում, NEWS.am-ի թղթակցին հայտնեց ՀՀ ԳԱԱ Արեւելագիտության ինստիտուտի տնօրեն, թուրքագետ Ռուբեն Սաֆրաստյանը՝ անդրադառնալով Թուրքալեզու պետությունների համագործակցության խորհրդի գագաթաժողովում տեղ գտած հայտարարություններին։

«Թուրքիան այդ միջոցառումն օգտագործում է՝ ցույց տալու համար, որ Հարավային Կովկասում եւ, հատկապես, Ադրբեջանում ուժեղ դիրքեր ունի։ Հարկավոր է ուշադրություն դարձնել «Ղարաբաղի ազատագրում» արտահայտությանը, այսինքն՝ Թուրքիան պետք է աջակցի Ադրբեջանին «Ղարաբաղն ազատագրելիս»»,- նշեց թուրքագետը՝ կարծիք հայտնելով, որ դա շատ վտանգավոր հայտարարություն է, քանզի վկայում է, որ Անկարան չի ձգտում միջնորդի դեր ստանձնել, այլ օգտագործում է ադրբեջական կողմի հռետորաբանությունը։

Նշենք` օգոստոսի 16-ին Ադրբեջանի Գաբալա քաղաքում կայացել է Թուրքալեզու պետությունների համագործակցության խորհրդի գագաթաժողովը։ Թուրք նախագահի հայտարարությունում մասնավորապես նշվել էր. ««Թուրքական աշխարհի բոլոր խնդիրներից գլխավորը Լեռնային Ղարաբաղի հիմնախնդիրն է։ Ադրբեջանի գրավված տարածքների շուրջ ստեղծված իրավիճակն անընդունելի է»։

Ա. Գյուլը նշել էր, որ ղարաբաղյան հիմնախնդիրը պետք է լուծվի ամենակարճ ժամկետում։ «Մենք ուժերի ներածին չափով կսատարենք հիմնախնդրի խաղաղ կարգավորմանը՝ Ադրբեջանի տարածքային ամբողջականության շրջանակում», – ընդգծել էր նա։

http://news.am/arm/news/167168.html