Քրդերը տոնել են PKK-ի առաջին գործողության տարեդարձը

Թուրքաբնակ քրդերը տոնել են Քրդստանի աշխատավորական կուսակցության (PKK) առաջին գործողության տարեդարձը։

Մի քանի հազար քուրդ հավաքվել է ներկայիս Թուրքիայի Շըրնաք նահանգում գտնվող Քաթո լեռը և տոնակատարություն անցկացրել։

Քրդերը լեռն են բարձրացել PKK-ի դրոշներով, իսկ լանջին կրակով գրել են «Ափո», որը կազմակերպության առաջնորդ Աբդուլլահ Օջալանի՝ ժողովրդի շրջանում տարածված անունն է։

Քրդերն այս կերպ տոնել են Թուրքիայի զինված ուժերի դեմ PKK-ի առաջին ռազմական գործողությունը, որը եղել է 1984 թվականի օգոստոսի 15-ին։

Նշենք, որ քրդերը որոշել են տոնել այդ գործողության 29-րդ տարին կիրակի օրը, այլ ոչ օգոստոսի 15-ին։

Հիշեցնենք, որ Քրդստանի աշխատավորական կուսակցությունը (Partiya Karkerên Kurdistan կամ PKK) քրդական կազմակերպություն է, որի նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում քրդական անկախ պետության հիմնումը:

Կազմակերպությունը հիմնադրվել է 1978 թվականին Դիարբեքիրում (Աղձնիք նահանգ), Աբդուլլահ Օջալանի (Ափո) կողմից, ով ներկայում ցմահ ազատազրկում է կրում թուրքական Իմրալը կղզու բանտում, սակայն շարունակում է համարվել կազմակերպության ղեկավարը։:

Կազմակերպությունն ակտիվ ռազմական գործողությունները Թուրքիայի դեմ սկսել է 1984 թվականին: Թուրքական իշխանությունների դեմ մղվող շուրջ 30 տարվա պայքարի ընթացքում զոհվել է մոտ 45 հազար մարդ:

30 տարի զինված պայքարից հետո, 2013 թվականի մարտին Դիարբեքիրում ընթերցվեց կազմակերպության առաջնորդ Աբդուլլահ Օջալանի ուղերձը, որով նա կոչ էր անում PKK-ին` վայր դնել զենքը, լքել Թուրքիայի տարածքը և անցնել քաղաքական պայքարի։

Մայիսի 8-ից պաշտոնապես սկսվեց PKK-ի դուրսբերումը Թուրքիայի տարածքից։

allTurkey.am