Ստամբուլի Բոյաջըքյոյի Սուրբ Երից Մանկանց եկեղեցու հիմնադրամի նախագահ Նազար Օզսահակյանը դիմել է Թուրքիայի ՆԳ նախարարության քաղաքացիության գործերով գլխավոր վարչություն`պահանջելով իրենց հանձնել 2 ծածկագիրը կրող քաղաքացիների ցուցակները:
Թուրքական Demokrathaber-ի կայքի փոխանցմամբ՝ Սուրբ Երից Մանկանց եկեղեցու հիմնադրամի նախագահ Նազար Օզսահակյանի գրավոր դիմումի մեջ նշվել է, որ տեղեկատվության ստացման օրենքի շրջանակներում պահանջում է իրենց հանձնել հատուկ ծածկագրով նշված բոլոր հայերի ցուցակները: Դիմումում ասվել է, որ վերջին շրջանում հայտնի է դարձել, թե Թուրքիայի հայերը կրում են հատուկ ծածկագիր, եւ առաջիկայում հիմնադրամի խորհրդի ընտրությունների հետ կապված` անհրաժեշտ են հայ ընտրողների ցուցակները:
Նշենք, որ օրեր առաջ Ստամբուլի հայկական «Ակօս» պարբերականը, քրիստոնեության վերադարձած եւ իրենց երեխային արդեն հայկական դպրոց ուղարկել ցանկացող ընտանիքը դժվարին գործընթացի ժամանակ բացահայտել է, որ Թուրքիայի Հանրապետության ստեղծումից ի վեր, Թուրքիայի հայերը կրում են գաղտնի ծածկագիր: Այսպես, երեխայի հարցով Ստամբուլի կրթության նահանգային վարչության կողմից Շիշլիի կրթության վարչություն ուղարկված պաշտոնական գրության մեջ բացահայտվել է, որ հայերը կրում են 2 ծածկագիրը:
Այս փաստը մեծ արձագանք է գտել Թուրքիայի առաջադեմ հասարակության շրջանում: Թուրքիայի գլխավոր ընդդիմադիր Ժողովրդահանրապետական (CHP) կուսակցության պատգամավոր Սեզգին Թանրըքուլուն այս հարցը տեղափոխել է Թուրքիայի խորհրդարան՝ իշխանություններից բացատրություն պահանջելով այս փաստի առթիվ:
Leave a Reply