Ստամբուլում տպագրվող հայկական «Ակօս» շաբաթաթերթի հրապարակումներից բացահայտվել էր սկանդալային մի իրողություն, համաձայն որի, թուրքական իշխանությունները կոդավորել են երկրի ազգային փոքրամասնություններին: Հայերի, հրեաների, հույների ծածկագրերի թեման քննարկման առարկա է դարձել լայն հասարակության համար: Բազմաթիվ հոդվածագիրներ դատապարտեցին պետական մարմինների այդ մոտեցումը և դա համարեցին օրենքի առջև Թուրքիայի քաղաքացիների անհավասարության փաստ և ռասիզմի դրսևորում:
Թուրքական «Քոնիա» կայքի տեղեկացմամբ` այդ բացահայտումը ոչ բոլորի համար էր նորություն: Օրինակ` «Ակօս»-ի նախկին գլխավոր խմբագիր Էթյեն Մահչուփյանը պատմել է, որ մանկության տարիներից նա գիտեր ու լսել էր այդ մասին: Մահչուփյանը նշել է, որ 1830-ականներից սկսած շատերը գիտեին, որ ազգային փոքրամասնությունների հատուկ ծածկագրերի տակ են առնված: Իսկ ահա հրեա գրող Մարիո Լևին ծածկագրերի գոյության մասին երբևէ չի իմացել: Նա ծայրաստիճան մտահոգիչ ու տագնապալի է համարել այդ երևույթը: Ստամբուլում Ֆեների հունական պատրիարքարանի խոսնակ Դոսիթոս Անաղնոսթոփուլոսը նշել է, որ դա խոր մտահոգության առարկա է դարձել բոլորի համար ու ևս մեկ անգամ ցույց տվել, որ Թուրքիայում քաղաքացիների միջև չկա հավասարություն:
Հիշեցնենք, որ հայտնի է դարձել, որ 1923-ից օգտագործվող ազգային փոքրամասնությունների ներկայիս ծածկագրերի համաձայն` հույները Թուրքիայում համարակալված են 1, հայերը` 2, հրեաները` 3 թվերի տակ:
Leave a Reply